Túngi reıd: Semeıde jasóspirimderge qatysty profılaktıkalyq sharalar kúsheıtildi
ASTANA. KAZINFORM — Abaı oblysy Polıtsııa departamentiniń qyzmetkerleri prokýratýra ókilderimen birlesip, Semeı qalasyndaǵy oıyn-saýyq oryndarynda túngi profılaktıkalyq reıdter júrgizip jatyr.
Oblystyq PD baspasóz qyzmetiniń málimetinshe, negizgi maqsat — kámeletke tolmaǵandardyń qaýipsizdigin qamtamasyz etý jáne olarǵa qatysty quqyq buzýshylyqtardyń aldyn alý.
Polıtseıler oıyn-saýyq mekemelerin, kompıýterlik klýbtardy jáne jastar kóp jınalatyn oryndardy tekserip júr. Ásirese, túngi ýaqytta zańdy ókilderinsiz júrgen jasóspirimderdi anyqtaýǵa erekshe nazar aýdarylady.
Kezekti reıd barysynda polıtsııa qyzmetkerleri oıyn-saýyq oryndarynyń birinen ata-anasyz júrgen kámeletke tolmaǵandardy anyqtady. Jasóspirimder profılaktıkalyq jumystar júrgizý jáne zańdy ókilderine tapsyrý úshin polıtsııa bólimine jetkizildi. Atalǵan faktiler boıynsha jasóspirimderdiń ata-analary men kámeletke tolmaǵandardyń túngi ýaqytta mekemede bolýyna jol bergen oıyn-saýyq ornynyń ákimshiligi zańnamaǵa sáıkes jaýapkershilikke tartylady.
— Kámeletke tolmaǵandarǵa qatysty quqyq buzýshylyqtardyń basym bóligi dál túngi ýaqytta, balalar eresekterdiń baqylaýynsyz qalǵan kezde bolady. Sondyqtan profılaktıkalyq jumystar men túngi reıdter polıtsııanyń erekshe baqylaýynda. Polıtseıler ata-analardy balalarynyń júrgen jerine beıjaı qaramaýǵa jáne olardy túngi ýaqytta qaraýsyz qaldyrmaýǵa shaqyrady, — delingen habarlamada.
Osydan buryn Almatyda jappaı tóbeles kezinde eki jasóspirim mert bolǵanyn jazdyq.
