Túngi klýbtardaǵy qaýipti áýestik: Elordalyq jastar narkozǵa arnalǵan gazdy tutynyp júr
ASTANA. KAZINFORM — «Oıyn-saýyqqa arnalǵan gaz» satý faktisi boıynsha 30 qylmystyq is qozǵaldy. Bul jóninde Astana qalasy Polıtsııa departamenti Esirtki qylmysyna qarsy is-qımyl basqarmasynyń bólim bastyǵy Álııa Qıbatqyzy málimdedi.
Mamannyń sózinshe, Astana polıtsııasyna sońǵy ýaqytta túngi klýbtarda azot totyǵy sharǵa úrlenip satylatyny jóninde aqparat túsken. Arnaıy reıdter nátıjesinde mundaı faktiler rastalǵan.
— Túngi klýbtarda turaqty túrde reıdter júrgizemiz. Jyl basynan beri azot totyǵyn satý boıynsha 30 qylmystyq is qozǵaldy. Atalǵan gaz toltyrylǵan júzden astam ballon tárkilendi, — dedi ol.
Atalǵan gaz, negizinde, medıtsınada narkoz jáne anestezııa úshin qoldanylady. Degenmen, oıyn-saýyq ortalyqtarynda ony qyz-jigitter shardan demalyp, ishke jutý arqyly psıhotroptyq zat retinde paıdalanyp júr. Sebebi, lezde kóńil-kúıdi kóterip, rahat syılap, mastandyrady eken.
— Osy bir sáttik aldamshy lázzattyń aýyr saldary jóninde jastar oılanbaıdy. Azottyń totyǵy densaýlyqqa — júıke, psıhıka jáne júrek-qan tamyr júıesine óte zııan, — deıdi Álııa Qıbatqyzy.
Aıta keteıik, buǵan deıin Shymkent qalasynda «oıyn-saýyqqa arnalǵan gaz» satýmen aınalysqan 10 mekeme ıesi jaýapqa tartylyp, 400-den astam ballon azot totyǵy tárkilengenin jazǵanbyz.
