Túngi klýbta qydyrǵan — Qyzylordada eki muǵalim jumystan bosatyldy
ASTANA. KAZINFORM - Qyzylordada túngi klýbta júrgenin áleýmettik jelide jarııalaǵan eki muǵalim jumystan bosatyldy. Bul týraly Bilim salasynda sapany qamtamasyz etý komıtetiniń tóraǵasy Ernur Dáýenov Feısbýktegi paraqshasynda jazdy.
"Kúndelikti qarym-qatynasta ádep normalaryn saqtaý muǵalimder úshin úırenshikti ádetke aınalýy tıis. Ókinishke oraı, ǵalamtorda muǵalimderdiń atalǵan prıntsıpterdi saqtamaıtyndyǵy týraly aqparat shyǵyp turady. Birneshe mysal keltireıin:
1. Qysqy demalys ýaqytynda Túrkııanyń túngi klýbtarynyń birinde qydyryp júrgen Qyzylorda oblysynyń eki muǵaliminiń áleýmettik jelilerdegi jarııalanymdary ata-analar qaýymynyń narazylyǵyn týdyrdy. Pedagogter jumystan bosatyldy.
2. Ótken jyly Pavlodar oblysyndaǵy №28 balabaqsha-bóbekjaıdyń jatyn bólmesine ornatylǵan baqylaý kamerasyna tárbıeshiniń balaǵa kórsetken dóreki áreketi túsirilgen. QR Eńbek kodeksiniń 52-babynyń 1-tarmaǵynyń 14-tarmaqshasyna sáıkes, pedagog teris sebeptermen jumystan bosatyldy", - dep jazdy Ernur Dáýenov.
Sondaı-aq, Bilim salasynda sapany qamtamasyz etý komıtetiniń tóraǵasy muǵalimderdiń jumys ornynda jáne qoǵamdyq jerlerde júris-turysyn, ózin ustaý ádebin aıqyndaıtyn zań normalaryn atap ótti.
«Pedagog mártebesi týraly» Zań pedagog mártebesin bekitip, pedagogtiń quqyqtaryn, áleýmettik kepildikteri men shekteýlerin, mindetteri men jaýapkershiligin belgiledi.
Mınıstrliktiń 2020 jylǵy 11 mamyrdaǵy № 190 buıryǵymen bekitilgen Pedagogıkalyq ádep erejelerin árbir muǵalim ustanýy tıis. Qaǵıdalarǵa sáıkes muǵalimder qyzmettik jáne qyzmettik emes ýaqytta 7 qaǵıdat pen 19 minez-qulyq normasyn saqtaýǵa mindetti.
"Pedagogıkalyq ádep qaǵıdalarynda pedagog áleýmettik jelilerde dáıeksiz jáne (nemese) ádepsiz aqparatty taratpaıdy, qoǵamda pedagogtiń joǵary ataǵyn nyǵaıtýǵa yqpal etedi, pedagogtiń joǵary ataǵynyń bedelin túsirýge múmkindik týǵyzatyn is-áreketterdi jasaýǵa jol bermeıdi delingen (Qaǵıdalardyń 7 tarmaǵynyń 4) jáne 17) tarmaqshalary)", - dep jazdy ol.
