«Túngi qaladaǵy balalar»: Tarazda 14 jastaǵy qyz bir aptada úsh ret polıtsııaǵa ustaldy
ASTANA. KAZINFORM — Taraz qalasynda túngi ýaqytta kóshede júrgen jasóspirim birneshe ret úıine jetkizilgen. Polıtsııa qyzmetkerleri anasy ekeýine túsindirme jumystaryn júrgizgenimen nátıje shyqpaǵan.
Reıd barysynda tirkelgen oqıǵalardyń biri Taraz qalasynyń 14 jastaǵy turǵynyna qatysty boldy. Polıtseıler sońǵy bir aptada ony túngi ýaqytta úsh ret úıine jetkizgen. Qyz buǵan deıin de quqyq qorǵaý organdarynyń nazarynda bolǵan. Jasóspirimmen jáne onyń anasymen birneshe ret profılaktıkalyq áńgime júrgizilgenimen, jaǵdaı ózgermegen. Sondyqtan kámeletke tolmaǵandardyń isteri jónindegi komıssııanyń sheshimimen qyz Balalardy qoldaý ortalyǵyna ornalastyryldy. Aldaǵy ýaqytta ony arnaıy mektepke jiberý josparlanyp otyr.
Jambyl oblysynda «Túngi qaladaǵy balalar» respýblıkalyq jedel-profılaktıkalyq is-sharasynyń qorytyndysy shyǵaryldy. Reıdter jasóspirimder arasyndaǵy quqyq buzýshylyqtyń aldyn alýǵa jáne túngi ýaqytta eresekterdiń qaraýynsyz júrgen kámeletke tolmaǵandardy qorǵaýǵa baǵyttaldy.
Іs-shara barysynda polıtsııa bólimshelerine 340 jasóspirim jetkizildi. Onyń 57-si ártúrli quqyq buzýshylyq jasaǵany úshin ustalǵan. Sondaı-aq qıyn ómirlik jaǵdaıǵa tap bolǵan 4 bala Balalardy qoldaý ortalyǵyna jiberildi.
Jambyl oblysy polıtsııa departamenti qoǵamdyq qaýipsizdik basqarmasynyń bastyǵy Manas Ábdikárimovtiń aıtýynsha, mundaı reıdterdiń negizgi maqsaty — jazalaý emes, eresekterdiń nazaryn, kómegin jáne baqylaýyn qajet etetin jasóspirimderdi der kezinde anyqtaý.
Profılaktıkalyq jumystar barysynda túngi ýaqytta zańdy ókilderiniń erip júrýinsiz úıden tys júrgen 266 jasóspirim anyqtaldy. Sonymen qatar zań talaptaryn buzyp, oıyn-saýyq oryndarynda bolǵan 17 kámeletke tolmaǵan ustaldy.
Reıd qorytyndysy boıynsha balalardy tárbıeleý mindetterin tıisinshe oryndamaǵany úshin 47 ata-ana ákimshilik jaýapkershilikke tartyldy. Sondaı-aq saǵat 22:00–den keıin kámeletke tolmaǵandardyń eresektersiz júrýine jol bergen 10 oıyn-saýyq mekemesiniń ıesi jazalandy.
Budan bólek, 21 jasqa tolmaǵandarǵa alkogol ónimderin satqan 9 azamat jaýapqa tartyldy. Al 19 jasóspirim men 11 qolaısyz otbasy profılaktıkalyq esepke qoıyldy.
Eske sala keteıik, Jambyl oblysynda jyl basynan beri 2000-nan astam jasóspirim polıtsııaǵa jetkizilgen.
