«Túngi qaladaǵy balalar»: Aqmola oblysynda 235 zańbuzýshylyq anyqtaldy
ASTANA. KAZINFORM — Aqmola oblysynda túnde eresekterdiń erip júrýinsiz kóshede júrgen 200-den astam jasóspirim anyqtaldy, dep habarlaıdy Polisia.kz.
Aqmola oblysynda «Túngi qaladaǵy balalar» jedel aldyn alý is-sharasynyń úsh kúninde polıtseıler kámeletke tolmaǵandar arasynda 235 quqyq buzýshylyqty anyqtady. Olardyń kópshiligi jasóspirimderdiń túnde ata-anasynyń nemese zańdy ókilderiniń erip júrýinsiz úıden tys jerde bolýymen baılanysty.
Polıtsııa departamentiniń málimetinshe, barlyǵy 222 osyndaı fakt tirkelgen. Sonymen qatar kámeletke tolmaǵandardyń alkogoldik ishimdikterdi tutynýynyń 10 jaǵdaıy, usaq buzaqylyqtyń eki faktisi jáne qoǵamdyq orynda adamnyń mazasyn alýdyń bir faktisi anyqtaldy.
Reıdterdiń qorytyndysy boıynsha balalardy tárbıeleý jónindegi mindetterdi tıisinshe oryndamaǵany úshin 16 ata-ana men zańdy ókil ákimshilik jaýapkershilikke tartyldy. Kámeletke tolmaǵandarǵa alkogol ónimderin satqan 4 tórt kásipker jaýapty boldy.
Profılaktıkalyq is-sharalar barysynda ıývenaldy polıtsııa qyzmetkerleri esepke alynǵan otbasylar men jasóspirimderdi tekserip, otbasylyq qolaısyzdyqtyń, qaraýsyz qalýdyń jáne jasóspirimder qylmysynyń aldyn alýǵa erekshe nazar aýdardy. Qazirgi ýaqytta ishki ister organdarynyń profılaktıkalyq esepterinde 670-ten astam qolaısyz ata-ana men 150 jasóspirim tur. JPІSh kezinde qosymsha 8 ata-ana men 2 kámeletke tolmaǵan bala esepke alyndy.
Bir mezgilde óńirde «Jasóspirim» jedel aldyn alý is-sharasy jalǵasyp jatyr. Osy jumys aıasynda ıývenaldy polıtsııa ınspektorlary zańsyz minez-qulyqqa beıim kámeletke tolmaǵandar arasynda úsh beıresmı kóshbasshyny anyqtady. Sonymen qatar Jarqaıyń aýdanynda kámeletke tolmaǵandardyń tyıym salynǵan zattardy zańsyz saqtaý nemese alyp júrý faktisi tirkelgen.
Sondaı-aq ınternet-keńistiktiń monıtorıngi barysynda balalardyń ómiri men densaýlyǵyna teris áser etýi múmkin kontenti bar 56 ınternet-resýrstar men jarııalanymdar anyqtaldy.
Polıtsııa ata-analardy jazǵy demalys kezinde balalardyń bolý jerin baqylaýdy kúsheıtýge jáne olardyń bos ýaqyty men qaýipsizdigine kóbirek kóńil bólýge shaqyrdy.
Aıta keteıik, buǵan deıin Atyraýda 83 jasóspirimniń ata-anasy ákimshilik jaýapkershilikke tartyldy.
