Túngi aýysymǵa qalǵan áripteske «qaıyrly tún» deýge bolmaıdy — qutqarýshymen suhbat
ÓSKEMEN. KAZINFORM — Qyzyl sý qyspaqqa alǵan Batys, Soltústik óńirlerge Qazaqstannyń ár túkpirinen qutqarýshylar kómekke attanǵan bolatyn. Óskemennen jol tartqan Evgenıı Egorov ShQO TJD jedel-qutqarý jasaǵy bastyǵynyń orynbasary bolyp qyzmet etedi. Ol 22 kún sonda bolyp, adamdardy evakýatsııalap, gýmanıtarlyq kómekti jetkizýmen aınalysty. 7 mamyr — Otan qorǵaýshylar kúnine oraı Evgenıı Egorovty áńgimege tartyp, sol kúnder jaıly óz aýzynan estigen edik.
— Áńgimemizdi osy salaǵa qalaı kelgenińizden bastasaq…
— Shynymdy aıtsam, bala kúnde qutqarýshy bolamyn dep esh oılamappyn. 2002 jyly kóshede kele jatyp taqtaıshaǵa jabystyrylǵan jumysqa qutqarýshylar qajet ekendigi týraly habarlandyrýdy kórip qaldym. Ol kezde qutqarý qyzmeti endi qurylyp kele jatqan. Jazylǵan mekenjaıǵa baryp, baıqaýǵa tústim. Fızıkalyq, psıhologııalyq turǵyda tekserip, qandaı qabiletterimiz baryn qarady. Synnan súrinbeı ótip, jumysqa turdym. Maǵan birden unady. Jańa adamdarmen tanysyp, talaı dúnıeni úırendim. Sol ýaqyttan beri osy saladamyn. Qatardaǵy qutqarýshydan bastap, qazirgi jaýapty laýazymǵa deıin jettim.
— Alǵashqy jumys kúnińiz esińizde me?
— Árıne. Ony qalaı umytaıyn. Sál-pál ýaıym bolǵany ras. Biraq áriptesterim qoldap, baǵyt berdi. Birinshi ret shaqyrtýǵa barǵanym da esimde. Úıiniń esigin asha almaı qalǵan ájege kómek kerek boldy. Ol oqıǵa kúni keshe bolǵandaı kóz aldymda tur. Negizi osyndaı jaǵdaıda esik qulybyn buzyp asha salǵan jeńil. Alaıda ájege esikti jóndetýge tura kelýshi edi. Sol úshin qulypty buzǵymyz kelmeı, shatyrǵa shyǵyp, tómenge túsip, tereze arqyly ishke kirdik. Sóıtip, esikti ashyp, ájeniń alǵysyn aldyq.
— Qutqarýshy bolý — ekiniń biriniń qolynan kelmeıdi. Ómirge qaýip tóndiretin bul salada jumys isteıtinińizge jaqyndaryńyz qalaı qaraıdy?
— Anam únemi ýaıymdap otyrady. Basynda «Nege osy mamandyqty tańdadyń?! Abaı bol!» deı beretin. Sodan keıin kóndikti. Áıelim de ásirese jumys babymen alys saparǵa ketip bara jatsam ýaıym keshedi. Olardy sabyrǵa shaqyryp, keterde betterinen súıip ketemin.
— Qutqarýshylardyń qandaı da bir ózindik yrym-tyıymdary bar ma?
— Bar. Máselen, bizdiń qyzmettegi sómkelerimiz únemi saqadaı saı turady. Oǵan jumysqa qajetti zattar salynady. Esh ýaqytta ol sómkeni ashyp, ishindegi zattardy shyǵaryp tastamaımyz. Al olaı istesek, mindetti túrde bir saparǵa shyǵyp ketesiń.
Túngi aýysymǵa qalǵan áripteske esh ýaqytta «qaıyrly tún» deýge bolmaıdy. Eger solaı aıtsań, onda mindetti túrde shaqyrtý túsip, abyr-sabyr bolady. Odan keıin bir tótenshe jaǵdaıǵa baryp, sonda órtpen nemese qyzyl sýmen kúresip jatqan ár qutqarýshynyń óziniń as-sý ishetin ydysy bolady. Tamaq iship bolǵan soń ony jaqsylap jýmaı, jaı sýmen shaıa salamyz. Eger jýyp muntazdaı etip qoısań, onda bul saparda uzaqqa qalyp qalasyń. Osy sekildi yrym-tyıymdarymyz kezdesedi.
— Qaýyrt qyzmetińizdegi eń aýyry ne?
— Kóz jumǵan nemese aýyr jaralanǵan adamnyń jaqyndarynyń kóz jasyn, qaıǵysyn kórý — óte aýyr. Buǵan etińdi úıretý múmkin emes. Bylaı qaraǵanda, osyndaı jaǵdaıda sabyrlyq tanytý mindetimiz, dese de ishteı qınalyp, mújilip turamyz. Qyzmet barysynda bundaıǵa talaı ret tap boldym. Sol úshin kásibı psıhologtarymyz bizden birge júredi. Qaıǵyrǵan adamdarmen solar sóılesedi.
— Sý tasqyny jaǵdaıy týraly, basqa óńirlerge kómekke qalaı baryp kelgenińiz jaıly aıta ketseńiz…
— Biz Soltústik Qazaqstanǵa kómekke bardyq. Atap aıtqanda, Qarasý aýdany Amangeldi, Qaramyrza, Qarasý aýyldarynda boldyq. Bir eldi mekende jaǵdaı turaqtalǵan soń basqasyna jolǵa shyǵyp otyrdyq. Rasymende jaǵdaı aýyr boldy. Sý degen óte kóp. Mundaı mol sýdy ómirimde birinshi ret kórdim. Úılerdi, aýlalardy sý basqan. Barlyq jerde adamdarǵa kómek kerek. Jol talǵamaıtyn «Sherp» kóligimen halyqty evakýatsııaladyq. Gýmanıtarlyq kómekti jetkizýmen aınalystyq. Azyq-túlik, dári-dármek tasydyq. Keıbir adamdarǵa úıinde qalyp qalǵan mańyzdy qujattaryn alyp berdik. Eki táýlik boıy múlde uıyqtamaǵan kezimiz boldy. 22 kún toqtaýsyz jumys istedik. Osy ýaqyt ishinde bizdiń jasaq qana 22 tonna gýmanıtarlyq kómek jetkizipti. Oblystan barlyǵy 10 adam baryp keldik.
— Áńgimeńizge kóp rahmet!
