Túngi aspanda jarqyrap aqqan ne
PETROPAVL. KAZINFORM — Soltústik Qazaqstan oblysynyń keı turǵyndary ótken túnde aspannan jarqyrap ótken belgisiz nysandy baıqap, erekshe kórinistiń kýási boldy.
Olardyń keıbiri bul sátti uıaly telefonǵa túsirip úlgergen.
Áleýmettik jelide taraǵan beınejazbadan kýágerlerdiń erekshe áser alǵanyn baıqaýǵa bolady.
Oqıǵa 12 qazan kúni saǵat 21:30 shamasynda bolǵan. Kýágerlerdiń biri aspanda jarqyrap ótken nysan meteorıt bolýy múmkin ekenin aıtady.
M. Qozybaev atyndaǵy Soltústik Qazaqstan ýnıversıtetiniń professory, belgili astrofızık Andreı Solodovnık bul qubylysty óz kózimen kórmegen. Beınejazbany tamashalaǵan ǵalymnyń pikirinshe, aspandaǵy jaryq qubylysy orbıtadan shyqqan ǵaryshtyq tehnıka bólshekteriniń atmosferada janýynan paıda bolýy múmkin.
— Bolıd bolýy múmkin edi, biraq, qozǵalys jyldamdyǵy birneshe ese baıaý. Bul zymyran tasyǵyshtyń joǵarǵy satysynyń qıraýy nemese orbıtadan shyqqan jerserik bolýy yqtımal.
Mundaı beınejazbalar álemniń basqa óńirlerinde de buryn túsirilgen. Qazir bizde jerserikterdiń sany myńnan asady. Sondyqtan bul jumysyn toqtatqan apparattardyń biri bolýy múmkin, — dedi Andreı Solodovnık.
Professordyń aıtýynsha, qazan aıynda túngi aspanda jaryq bolıdterdi baıqaýǵa bolady. Osy kezeńde Jer birden birneshe iri meteor aǵynynyń orbıtasyn kesip ótedi. Negizgi sebebi — kometalardan bólingen usaq bólshekterdiń Jer atmosferasyna asa joǵary jyldamdyqpen enýi.
— Meteorıt jerge qulaǵan kezde adamdar onyń dybysyn estýi múmkin. Ondaıda kún kúrkiregendeı bolady. Al aspanda tek jarqyrap ótip ketse, ol bolıd bolýy múmkin. Ádette, mundaı qubylys qaýip tóndirmeıdi, nysan atmosferada janyp, jerge jetpeı tozańǵa aınalady, — dedi astrofızık.
Buǵan deıin Perseıdter meteor aǵyny 13 tamyzǵa qaraǵan túni sharyqtaý shegine jetetinin jazǵan edik.
