Túnde júgirýge shyqqan Almaty turǵynyn belgisiz bireý soqqyǵa jyqty
ALMATY. QazAqparat - Túnde júgirýge shyqqan Almaty turǵynyn uryp ketken adam ustaldy, dep habarlaıdy QazAqparat tilshisi.
Polıtsııa departamentiniń habarlaýynsha, 45 jastaǵy Aleksandr túnniń bir ýaǵynda júgirýge shyqqan. Úıden uzamaı-aq oǵan bireý shabýyl jasaǵan. Qaskóı ony judyryǵymen birneshe ret uryp, uıaly telefonyn tartyp alǵan.
«Oqıǵa esimde joq, kózim qaraýytyp ketti, túngi ýaqyt bolatyn. Bir jigit qasyma kelip, eshteńe aıtpastan betimnen birneshe ret urdy. Men óz-ózime kelgenshe, ol meniń uıaly telefonymdy alyp, qashyp ketti. Men dereý polıtsııaǵa bardym, olar meniń ótinishimdi qabyldady. Az ýaqyt ishinde ustaǵandaryńyz úshin rahmet», – dedi Aleksandr.
Polıtsııa birneshe kúnnen keıin kúdiktini qolǵa túsirdi. Almaty oblysy Qarasaı aýdanynyń 25 jastaǵy turǵyny buryn qaraqshylyq jasaǵany úshin sottalǵan. Ol óziniń kinásin tolyǵymen moıyndady. Qazirgi ýaqytta kúdikti Almaty qalasy PD ýaqytsha ustaý ızolıatoryna qamaldy.
«QR QK-niń 191-baby (Tonaý) boıynsha sotqa deıingi tergeý amaldary júrgizilýde. Kúdiktiniń basqa qylmystarǵa qatysy bar-joǵy sózsiz tekseriledi», – dedi Almaly aýdandyq PB janyndaǵy polıtsııa bóliminiń bastyǵy Dýman Aýhadıev.
