Túnde urlanǵan bir úıir jylqyny aıdap bara jatqan barymtashy ustaldy
QARAǴANDY OBLYSY. QazAqparat – Qaraǵandy oblysynda urlanǵan bir úıir jylqyny aıdap bara jatqan er adam daladan ustaldy, dep habarlaıdy QazAqparat Polisia.kz saıtyna silteme jasap.
7 qazan kúni Qaraǵandy oblysy Qarqaraly aýdany polıtsııa bóliminiń qyzmetkerleri «Ýchaske» jáne «Mal urlaý» jedel-izdestirý is-sharalaryn ótkizdi. Túnde saǵat 22.00-de olar daladan bir úıir jylqyny (30 jylqy) baıqaǵan. Kúdiktengen polıtsııa úıirdi aıdaǵan jylqyshyny ustady.
«Bastapqyda jylqyshy bul óziniń jylqysy ekenin aıtqan. Biraq polıtsııa barlyq jergilikti malshylardy jaqsy biletin bolǵandyqtan, onyń aılasy iske aspady. Ustalǵan azamat 58 jastaǵy Shyǵys Qazaqstan oblysynyń turǵyny bolyp shyqty. Ol buryn ishki ister organdarynda esepte turǵan», – dep atap ótti qaraǵandy oblysy PD basshysy Erlan Faızýllın.
Anyqtalǵandaı, osydan 40 mınýt buryn er adam shopan qystaǵynyń janynda jaıylyp júrgen 30 jylqyny urlap ketken. Jábirlenýshi – 47 jastaǵy aýyl turǵyny.
QR QK 188-1-baby «Mal urlyǵy» boıynsha qylmystyq is qozǵaldy . Tergeý amaldary júrgizilýde. Ustalǵan adam ýaqytsha ustaý ızolıatoryna qamaldy.
