Túnde kóretin qural Saryaǵashta shekara buzýshyny ustaýǵa kómektesti
SARYAǴASh. QazAqparat - Saryaǵashtyq shekarashylar Ózbekstannan bizdiń elge jasyryn ótpekshi bolǵan memlekettik shekara buzýshyny ustady, dep habarlaıdy QazAqparat UQK ShQ baspasóz qyzmetine silteme jasap.
Kózge túrtse kórgisiz tún qarańǵylyǵynda butadan butaǵa júgirip, jan-jaǵyna jaltaqtaı qarap, baspalap kelip tikenek symdy qorshaýdyń ústinen órmelep, bizdiń eldiń aýmaǵyna qaraı ótip kele jatqan shekara buzýshyny eń birinshi bolyp Ońtústik shekaranyń Saryaǵash shekara jasaǵyna qarasty «Qaplanbek» zastavasynyń túnde kóretin quralmen jabdyqtalǵan beınebaqylaý operatory baıqaǵan. Ol radıostantsııa arqyly sol mańdaǵy shekara narıadyna habar bergen. Shekara buzýshynyń baǵyty týraly aqparatty alǵan shekara narıadynyń basshysy boılaryn tasalap, «shaqyrylmaǵan qonaqty» qarsy aldynan tosyp aldy.
Ustalǵan adam Ózbekstan azamaty bolyp shyqty. Ózimen birge eshqandaı qujaty joq. Quqyq qorǵaý oryndary habarlanyp, onyń kim ekendigin anyqtaý jumystary júrgizilýde.
