Túnde qaraýsyz júrgen balalar: 480-nen asa ata-ana jaýapkershilikke tartyldy
ASTANA. KAZINFORM — Qazaqstanda túnde qaraýsyz júrgen balalarǵa qatysty reıdter júrgizildi, dep habarlaıdy Іshki ister mınıstrliginiń baspasóz qyzmeti.
ІІM úshin memlekettik organdarmen jáne jurtshylyqpen ózara is-qımyldaǵy basym baǵyttardyń biri — kámeletke tolmaǵandar arasyndaǵy jáne olarǵa qatysty quqyq buzýshylyqtyń aldyn alý.
Osy baǵytta 7-8 tamyz aralyǵynda Astana, Shymkent qalalary men Abaı oblysynyń aýmaǵynda maqsatty profılaktıkalyq is-sharalar júrgizildi.
Mundaı sharalardyń negizgi maqsaty — jasóspirimder arasyndaǵy jáne olarǵa qatysty zańsyz áreketterdiń aldyn alý jáne olardy erte kezeńde anyqtaý.
— Basty nazar kámeletke tolmaǵandarǵa qatysty quqyq buzýshylyqtarǵa jol bermeý maqsatynda túngi ýaqytta eresekterdiń qaraýynsyz júrgen balalardy anyqtaýǵa aýdaryldy. Nátıjesinde túngi ýaqytta balasynyń qaıda júrgenin baqylaýdy qamtamasyz etpegen 480-nen astam ata-ana jaýapkershilikke tartyldy, — deıdi tártip saqshylary.
Іs-sharanyń taǵy bir mańyzdy baǵyty — jasóspirimderge alkogol jáne temeki ónimderin satý faktileriniń aldyn alý. Osy quqyq buzýshylyq úshin 28 kásipker jaýapkershilikke tartyldy.
ІІM birinshi kezekte aldyn ala áreket etýge baǵyttalǵan profılaktıkalyq jumystyń mańyzyn atap ótedi. Máseleni ýaqytyly anyqtap, onymen naqty jumys júrgizý arqyly quqyq buzýshylyqtyń aldyn alýǵa jáne balanyń qaýipsizdigin qamtamasyz etýge bolady.
ІІM balalardyń qaýipsizdigi ortaq jaýapkershilik ekenin atap kórsetedi. Polıtsııa ózine júktelgen mindetterdi oryndaýmen qatar, ata-analardyń da róli mańyzdy ekenin eske salady. Ata-analar balasynyń qaıda júrgenin, kimmen aralasatynyn, nemen aınalysatynyn jáne bos ýaqytyn qalaı ótkizetinin bilýi tıis.
Óz kezeginde polıtsııa kámeletke tolmaǵandardyń quqyqtaryn qorǵaýǵa baǵyttalǵan profılaktıkalyq is-sharalardy turaqty túrde jalǵastyryp, balalardyń qaýipsizdigin qamtamasyz etý jáne quqyq buzýshylyqtardyń aldyn alý boıynsha barlyq qajetti sharalardy qabyldaıdy.
Osyǵan deıin Túrkistan oblysynda balalardyń qaraýsyz qalýynan 8 sýdaǵy jazataıym oqıǵa tirkelgeni anyqtaldy.
