Túnde er adamdarǵa qaraǵanda áıelder jıi jan tapsyrady

ASTANA. KAZINFORM – Sedars-Sınaı aýrýhanasynyń (AQSh) kenetten júrek toqtaýynyń aldyn alý ortalyǵynyń qyzmetkerleri Heart Rhythm jýrnalynda zertteý nátıjelerin jarııalady.

Mamandar áli kúnge deıin túngi uıqy kezinde júrek bulshyqetiniń zat almasýy men jıyrylý jıiligi baıaýlap, qan qysymy tómendep, keıde júrektiń elektrlik belsendiligi kenetten buzylyp, toqtap qalýynyń sebebin bilmeıdi. Bul qubylys ádette ólimge ákeletini belgili. Onyń ınfarkttan aıyrmashylyǵy – denede eshqandaı aýyrsyný belgileri baıqalmaıdy. Júrektiń kenetten toqtaýy áıelderge qaraǵanda erlerde jıi kezdesedi eken. Dese de, túngi ýaqytta áıelderdiń úlesi basym.

Zertteýshiler júrektiń kenetten toqtap qalýynyń tórt myńnan astam jaǵdaılary týraly derekterdi taldaǵan. Onyń úsh myńnan astamy kúndizgi ýaqytta, al qalǵandary keshki saǵat 22.00 men tańǵy 6-ǵa deıin bolǵan.

Tún ortasynda qaıtys bolǵandardyń arasynda erlerge (20,6%) qaraǵanda áıelder (25,4%) kóp ekeni anyqtalǵan.

Túnde jynysyna qaramastan ókpeniń sozylmaly obstrýktıvti aýrýy men ókpeniń demikpesine shaldyqqandar, temeki shegetinder jıi jan tapsyrǵan. Sonymen qatar, qaıtys bolǵandardyń kóbi mıǵa qandaı da bir túrde áser etetin uıyqtatatyn dáriler, analgetıkter nemese antıdepressanttar sııaqty tynys alýdy basýy múmkin preparattardy qabyldaǵan.

Nátıjeler negizinde ǵalymdar dárigerlerge mundaı dári-dármekterdi kenetten júrek toqtap qalý qaýpi joǵary adamdarǵa, ásirese áıelderge taǵaıyndaǵanda saqtyqpen qoldanýǵa keńes beredi.