Túnde Astana vokzalynda bomba izdeldi, ǵımarattan 350 adam qaýipsiz jerge kóshirildi
ASTANA. 10 qańtar. QazAqparat - Búgin túnde Astanadaǵy temirjol vokzaly ǵımaratyna bomba qoıylǵany týraly habarlama kelip túsken soń odan 350 adam qaýipsiz jerge kóshirildi.
Bul týraly QazAqparat tilshisine QR ІІM-niń kóliktegi ІІD baspasóz qyzmetinen habarlady.
Baspasóz qyzmeti qyzmetkeriniń túsindirýinshe, 9 qańtar kúni saǵat 23:11-de Jedel basqarý ortalyǵynyń «102» operatorynyń nómirine taksofonnan belgisiz bireý telefon shalyp, temirjol vokzalyna bomba qoıylǵany týraly habarlaǵan.
«Jedel den qoıýdyń barlyq qyzmetterine habarlandy. Astana stansasyndaǵy polıtsııanyń jelilik basqarmasynyń búkil jeke quramy dabyl boıynsha shaqyryldy. Oqıǵa ornyna Astana qalalyq ishki ister departamentteriniń, UQK, TJ boıynsha, prokýratýra, jedel medıtsınalyq járdem qyzmetkerleri shyqty», - dep baıandady baspasóz qyzmetinen.
Ǵımarat qorshaýǵa alynyp, 200 jolaýshy men vokzaldyń 150 qyzmetkeri qaýipsiz jerge kóshirildi. Astana qalalyq ІІD «Arlan» arnaıy taǵaıyndaý bólimshesiniń jáne kóliktegi ІІD kınologııalyq ortalyǵynyń qyzmetkerleri qyzmettik-izdeý ıtteriniń kómegimen ǵımarattyń barlyq bólmeleri men oǵan jaqyn ornalasqan aýmaqty tekserdi. Jarylǵysh zat tabylǵan joq. Operatsııany ótkizý kezinde «Astana-Petropavl» baǵytyndaǵy jolaýshylar poıyzy bir saǵatqa keshiktirildi.
«Jarylǵysh zat týraly habarlaǵan adam izdestirilip jatyr. QR Qylmystyq kodeksiniń 242 baby boıynsha qylmystyq isti qozǵaý týraly másele sheshilýde», - dep túıindedi baspasóz qyzmetindegiler.
