Tún ortasynda Semeı kóshesinde jalǵyz júrgen bala úıine oraldy
SEMEI. QazAqparat -Joǵalǵan 8 jasar Nurálı Mellet úıine oraldy, dep habarlaıdy QazAqparat.
Aqpannyń 24-nen 25-ne qaraǵan túni Áýezov dańǵyly boıyndaǵy saýda úıleriniń biriniń mańynan tabylǵan bala Áýezov polıtsııa bólimine tapsyrylǵan bolatyn. Túńgi saǵat 3-te jalǵyz ózi kóshe kezip júrgen balany Nazym esimdi qala turǵyny kórgen.
«Janyna baryp, esimin suraǵan ýaqytta bala qasha jóneldi. Kún aıaz boldy. Eger bir jerge otyryp, uıyqtap qalsa úsip qalady. Sondyqtan sońynan qalmaı júrip otyrdym. Toqtap turǵan Aleksandr esimdi kólik júrgizishisinen kómek suradym. Aleksandr kólikte qaldy. Al men taǵy balany qorqytyp almas úshin serýendep júrgen keıip tanytym. Qasyna jetken ýaqytta taǵy qashyp ketpes úshin qolynan ustap jibermedim», - deıdi Nazym.
Bala Aleksandr men Nazymnyń eshbir suraǵyna jaýap bermegen. Sóıtse estý qabiletinen aıyrylǵan eken. Birden ony Áýezov polıtsııa bólimine tapsyrady. Polıtsııa qyzmetkerleri ata-anasyna izdeý jarııalap, balany ýaqytsha beıimdelý jáne kámeletke tolmaǵandardy saýyqtyrý ortalyǵyna ornalastyrady.
Іsti qaraý barysynda polıtsııa ınspektorlarynyń biri, birneshe aı buryn oıynshyq dúkenderiniń birinde bolǵan oqıǵaǵa qatysy bar bala ekenin esine túsiredi. Ol kezde ol oıynshyq satatyn dúkenge kirip, esh sebepsiz sóredegi oıynshyqtardy shashqan. Polıtsııa qyzmetkerleri eski isti qarap, sonda kórsetilgen meken-jaıǵa barady.
«Meken-jaıy durys bolyp shyqty. Balanyń ata-anasy da keshten bastap izdep jatqandaryn jetkizdi. Biraq polıtsııaǵa habar bermegen. Bul oqıǵa birinshi ret emes eken. Eger bala joǵalsa, birden quqyq qorǵaý organdaryna habar berý kerek. Qazir balanyń jaǵdaıy jaqsy, úıinde. Ana-anasy tabylǵan boıda baryp alyp ketti», - deıdi Jergilikti polıtsııa qyzmeti basshysynyń orynbasary Ádilbek Nyǵmanov.
