«Tún qudaıy» Sahalınge attandy
ASTANA. QazAqparat - Qazaqstandyq rejısser Ádilhan Erjanovtyń «Tún qudaıy» fılmi Sahalındegi kınofestıvalde kórsetiledi, dep habarlaıdy QazAqparat tilshisi «Qazaqfılm» kınostýdııasynyń baspasóz qyzmetine silteme jasap.
QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy túsirgen «Tún qudaıy» fılmi Sahalın Halyqaralyq «Jer qıyry» («Kraı sveta») kınofestıvaliniń baıqaýdan tys «Kórshiler/Dostar» atty baǵdarlamasynda kórsetiledi. Festıval Ońtústik Sahalınde tamyzdyń 24-31 aralyǵynda Sahalın gýbernatorynyń qoldaýymen ótkizilmek.
«Tún qudaıynan» bólek, «Jer qıyrynyń» negizgi baıqaýynda rejısser Erjanovtyń taǵy «Álemniń meıirimdi enjarlyǵy» atty fılmi de qatysady», - delingen habarlamada.
Al týyndysy halyqaralyq kınofestıvalde kórsetilgeli otyrǵan Ádilhan Erjanovtyń aıtýynsha, negizgi uıymdastyrýshylar baıqaýǵa dástúrli «kınotilde» túsirilgen fılmderdi qabyldaıdy.
«Álemniń meıirimdi enjarlyǵy» fılmi osy formatqa sáıkes keledi. Al «Tún qudaıy» - sıýjet logıkasyn elemeı, obraz tazalyǵyn kórsetýge tyrysqan eksperımentaldy baǵyttaǵy fılmim. Qatarynan eki fılmim festıvalge qatysyp otyrǵany qýanyshtymyn, óıtkeni olar formasy men mazmuny jaǵynan bir-birine qaıshy», - deıdi rejısser.
