Tún ishindegi órt rıdderlikterdi ábigerge saldy
ASTANA. QazAqparat - Shyǵys Qazaqstan oblysynyń Rıdder qalasynda 2 qabatty turǵyn úıden órt shyqty. Bul týraly QR ІІM Tótenshe jaǵdaılar komıtetiniń resmı ókili Nursultan Nurahmetov málim etti, dep habarlaıdy QazAqparat tilshisi.
Aqparatqa súıensek, búgin tańǵa saǵat 03.10-da órtke qarsy qyzmet pýltine Shyǵys Qazaqstan oblysy Rıdder qalasynyń Áýezov kóshesi boıyndaǵy 2 qabatty turǵyn úıdiń órtenip jatqandyǵy týraly habar túsken. Órt ekinshi qabattaǵy páterlerdiń birinen shyǵyp, 20 sharshy metr aýmaqty sharpyǵan.
«Órt sóndirýshiler 21 adamdy, onyń ishinde 1 balany qaýipsiz jerge shyǵardy. Saǵat 04.03-te qyzyl jalynnyń aldy alynyp, 04.29-da tolyqtaı sóndirildi. Órt saldarynan kúıik shalǵan 50 jastaǵy azamat aýrýhanaǵa jatqyzyldy. Ot tutanýynyń aldyn ala sebebi - shylym shegý barysyndaǵy abaısyzdyq», - dedi resmı ókil.
Órtti sóndirýge Shyǵys Qazaqstan oblystyq TJD jeke quramynyń 13 mamany men 3 tehnıkasy jumyldyryldy.
