Tumsa tabıǵat – Ulttyq mýzeıde «National Geographic» jýrnalynyń fotokórmesi ashyldy
ASTANA. KAZINFORM – QR Ulttyq mýzeıinde «National Geographic» jýrnalynyń «Janýarlar áleminiń ǵajaıyp sýretteri» atty fotokórmesi ashyldy. Kelýshiler álemniń túkpir-túkpirindegi túrli jabaıy ańdar sýretin tamashalaı alady.
Kórmede «National Geographic» jýrnalyndaǵy jarııalanymdar arasynan tańdap alynǵan haıýanattar áleminiń eń úzdik sýretteri usynylǵan.
«Osydan 8 jyl buryn osy kúni «National Geographic Qazaqstan» jýrnalynyń alǵashqy nómirin shyǵarǵan edik. Sonda «Álemdi ózgertken 50 úzdik foto» kórmesin osy mýzeıde uıymdastyrdyq. Kórermenderdiń ystyq yqylasy men joǵary baǵasy bizdi shabyttandyryp, osy aǵartýshylyq baǵytta turaqty túrde álemdik deńgeıdegi fotokórmelerdi ótkizýdi uıǵardyq. Sodan keıin «Taǵam bolashaǵy», «Kıikter», «Aqjaıyqty aıalaıyq», «Alys ta jaqyn Amerıka», sırek, joıylyp bara jatqan ań-qustar týraly «Fotoarasha» kórmelerin usyndyq», - deıdi «National Geographic Qazaqstan» jýrnalynyń bas redaktory Erkin Jaqyp kórmeniń tusaýkeserinde.
«National Geographic Qazaqstan» jýrnaly óziniń mıssııasy retinde álemniń 3 myńnan astam zertteýshisin mańyzdy jobalary men zertteýlerin qazaqtildi aýdıtorııaǵa turaqty túrde qoljetimdi etip keledi.
«Sol arqyly qazaqtildi jastardyń, óskeleń urpaqtyń ǵylymǵa degen qyzyǵýshylyǵyn arttyrǵymyz keledi. Árbir fotograftyń álemdik deńgeıde orny bar, olardyń árqaısysy zertteýshi jáne baıandaýshy rólin atqarady. Ár fotograftyń óz stıli men kózqarasy bar. Máselen Beverlı Jýber, Devıd Dýbıle syndy fotograftardyń biri býıvol shabýylynan jambasyn syndyrsa, ekinshisi 20-dan astam synyq alyp, uzaqmerzimdi terapııa aldy. Al Maıkl «Nık» Nıkols 35 jasyna deıin tumsa tabıǵatty túsiremin dep 25 ret bezgek aýrýymen aýyrǵan. Sondyqtan ár fotograf osyndaı qıyn azaptarǵa tózýge daıyn», - deıdi «National Geographic Qazaqstan» jýrnalynyń bas redaktory.
Tabıǵat sýretteriniń redaktory Ketı Morannyń jetekshiligimen ázirlengen bul kórme Maıkl «Nık» Nıkols, Stıv Ýınter, Pol Nıklen, Beverlı Jýber, Devıd Dýbıle jáne National Geographic-tiń basqa da eń tanymal fotograftarynyń sýretterinen quralǵan.
Bul fotolardan ajal taıap kelgendegi ańnyń qorqynyshyn nemese tólin qorǵaǵan ananyń alpaýyt kúshi sııaqty erekshe fotolardy kórýge bolady. Uıymdastyrýshylar bul fotokórmeden Jer planetasyn aman saqtap qalý mıssııasyna bir qadam jaqyndaýdy kózdeıdi.
«Men «National Geographic» jýrnalyna «erikti elshi» retinde qoldaý kórsetip turamyn. Búgingi kórmeniń ereksheligi – jabaıy tabıǵat kórinisteri. «National Geographic» jýrnalynyń negizgi mıssııasy – adamnyń tabıǵatty, planetany tanýyna, túsinýine kómektesý. Shyn máninde adamzat tarıhynda biz tabıǵatpen garmonııada ómir súrgenbiz. Ókinishke qaraı, óndiristik revolıýtsııa bastalǵanda sol tyǵyz garmonııany joǵaltyp aldyq. Ásirese qazir bizdiń balalarymyz vırtýaldy tsıfrlyq álemde ómir súrip jatyr, kóp jaǵdaıda tabıǵatty túsinbeıdi. Adamnyń tabıǵatty túsinbeýinen qorshaǵan ortaǵa qatysty ekologııalyq problemalar bastalady. Qoqysty durys jınamaý sekildi kúndelikti mádenıetimizden úlken máeleler jınaqtalady. Bir kezderi National Geographic plastık taqyrybyn alǵashqy kótergenderdiń biri boldy. Sondyqtan búgingi kórmeniń mańyzdylyǵy – keleshek urpaqtyń tabıǵatpen baılanysyn úzbeý, jabaıy tabıǵattyń qandaı keremet ekenin balalarymyzǵa túsindirý», - dedi QR Ǵylym jáne joǵary bilim mınıstri Saıasat Nurbek.
«Janýarlar áleminiń ǵajaıyp sýretteri» fotokórmesi Ulttyq mýzeıde 25 aqpanǵa deıin jalǵasady.
