Reseıdiń Túmen oblysynda sý tasqyny qaýpi tóngen aımaq kóbeıdi
ASTANA. KAZINFORM – Túmen oblysynyń bıligi oblysta kóktemgi sý tasqyny boıynsha boljamyn málimdedi. Ilınka aýyly mańyndaǵy Esil ózeniniń deńgeıi 2017 jylǵy tarıhı maksımýmynan asty.
Qazirgi ýaqytta kóktemgi sý tasqynynyń ótýine baılanysty eń kúrdeli jaǵdaı Orynbor, Qorǵan jáne Túmen oblystarynda baıqalyp otyr. Orynbor oblysynda tasqyn tolqyny Orsk jáne Orynbor qalalaryn basyp ótti. Bul negizinen Irıklınsk sý qoımasynan tógiletin sýlardyń azaıýyna baılanysty. Degenmen bul qalalardaǵy sý deńgeıi áli de qaýipti deńgeıden joǵary.
«Tasqyn tolqyny Jaıyq ózeni aǵysymen tómen qaraı jyljyp, Qazaqstanmen shekaralas Elek aýylyna jaqyndap keledi. Mundaǵy sý deńgeıi qazirdiń ózinde qaýipti qubylys deńgeıine jetti», - dep habarlady sársenbi kúni Reseı prezıdentiniń qatysýymen ótken keńeste Reseı TJM basshysy Aleksandr Kýrenkov.
18 sáýirdegi jaǵdaı boıynsha Orynbor oblysynda 76 eldi meken men 45 baýa-baqsha seriktestigi, 15 myńnan astam turǵyn úı, 23 myńǵa jýyq sharýashylyq ýchaskeleri jáne 26 sýy tómen kópir sý astynda qaldy. 35 ýaqytsha ornalastyrý ortalyǵynda 1031 adam, onyń ishinde 203 bala bar. Qorǵan oblysynda sý tasqynynan zardap shekken úıler men ekonomıka nysandarynyń sany aıtarlyqtaı az. 25 eldi mekende 2 myńnan astam turǵyn úı men 3 myńnan astam saıajaı, 5 sýy tómen kópir men 8 jol ýchaskesi sý astynda qaldy. Sý deńgeıi áli sharyqtaý shegine jetken joq. Búginde sý tasqyny Qorǵan qalasyna jaqyndap, 987 sm deńgeıine jetti. Aldaǵy kúnderi onyń tarıhı maksımým – 11 metrge deıin jetedi dep shamalanyp otyr.
«Túmen oblysynda 8 mýnıtsıpalıtette sýy tómen 12 kópir men tasjoldyń bir ýchaskesi sý astynda qaldy. Bul sýbekt boıynsha boljam qolaısyz», - dep málimdedi Reseı TJM basshysy. Ol jaǵdaıdyń damýynyń eń nashar stsenarııin joqqa shyǵarýǵa bolmaıtynyn qosyp ótti.
Esil men Tobyl ózenderiniń sýy qaýipti deńgeıge tez kóterilýi múmkin degen boljam bar. Bul 31 myńnan astam turǵyny bar 94 eldi mekendegi jeke turǵyn úılerdiń aýmaǵyn sý basýy múmkin ekenin bildiredi.