Tumaýǵa qarsy vaktsına pnevmonııanyń aldyn alady - mınıstrlik

ASTANA. QazAqparat - 12 qarasha - Dúnıejúzilik pnevmonııaǵa qarsy kúres kúni. Dál osy kúni Dúnıejúzilik densaýlyq saqtaý uıymy UNISEF-pen birlesip pnevmonııanyń aldyn alý jáne oǵan qarsy kúrestiń jahandyq is-qımyl josparyn jarııalady, dep habarlaıdy QazAqparat.

Pnevmonııa - dúnıe júzinde eresekter men balalar óliminiń kóp taraǵan juqpaly sebebi.

2019 jyly 2,5 mıllıon adam, onyń ishinde 672 000 bala qaıtys boldy.

Qazaqstanda pnevmonııadan bolatyn aýrý men ólim-jitim koronavırýsqa deıingi kezeńmen salystyrǵanda ósti.

Halyqtyń osal toptarynyń qoljetimdi aralasýlarmen qamtylýyn jaqsartý maqsatynda 2023-2025 jyldarǵa arnalǵan ftızıopýlmonologııalyq qyzmetti damytý jónindegi Jol kartasynyń jobasy ázirlendi, onyń sheńberinde tynys alý organdarynyń aýrýlary kezinde medıtsınalyq kómekti halyqqa uıymdastyrý, tynys alý organdarynyń aýrýlary kezinde medıtsınalyq kómektiń qoljetimdiligi men sapasyn qamtamasyz etý, tynys alý organdarynyń aýrýlary kezinde kómek kórsetý úshin, emdeý-dıagnostıkalyq protsesti jetildirý, onyń ishinde medıtsınalyq uıymdardy jaraqtandyrýmen qamtamasyz etý, kadrlyq áleýetti damytý josparlanyp otyr.

Tumaýǵa, pnevmokokkqa jáne gemofıldi taıaqshaǵa qarsy vaktsınatsııa da - pnevmonııanyń damýyna jol bermeýdiń tıimdi ádisteriniń biri.

Atap aıtqanda, pnevmonııa barlyq jastaǵy adamdarǵa áser etedi, biraq ásirese aǵa býynǵa, ımmýn tapshylyǵy bar adamdarǵa jáne 5 jasqa deıingi balalarǵa qaýipti, óıtkeni dál osy toptardyń ımmýnıteti álsiregen nemese áli jetilmegen bolyp keledi.

Aǵzalardy transplantatsııalaý nemese hımıoterapııa kýrsyn júrgizý saldarynan ımmýndyq júıesi álsiregen adamdar, sondaı-aq jaman ádeti barlar pnevmonııamen aýyrýǵa beıim.

Júkti áıelder de ómirge qaýip tóndiretin pnevmonııanyń damý qaýpine ushyraýy múmkin.

Pnevmonııanyń damýynyń qaýip faktorlarynyń ishinde adamda bronh demikpesi, qant dıabeti jáne sozylmaly obstrýktıvti ókpe ilespe aýrýy bar.

«Ózińizdi tumaýdan jáne onyń asqynýlarynan (pnevmonııa) qorǵaý úshin tumaýǵa qarsy ekpe alý, adamdar kóp jınalatyn jerlerde jáne qoǵamdyq kólikte bolý ýaqytyn qysqartý, adam kóp jınalatyn jerlerde maska men qolǵap kııý, respıratorlyq aýrýdyń belgileri bar adamdarmen tyǵyz baılanysta bolýdan aýlaq bolý qajet» dep eskertedi Densaýlyq saqtaý mınıstrligi.

Sondaı-aq, kóshe men qoǵamdyq kólikten keıin qolyńyzdy sabynmen únemi jýyp otyrý kerek, turǵan bólmeni jeldetip, ylǵaldy tazalaýdy júrgizý qajet.

Gemofıldi, pnevmokokkty ınfektsııaǵa, qyzylshaǵa jáne kókjótelge qarsy ımmýndaý - pnevmonııanyń aldyn alýdyń tıimdi ádisi.