Tumaýǵa qarsy vaktsına kimderge birinshi kezekte salynady
NUR-SULTAN. QazAqparat – Ulttyq densaýlyq saqtaý ortalyǵynyń qoǵamdyq densaýlyqty nyǵaıtý ortalyǵynyń jetekshisi Jazıra Emberdıeva tumaýǵa qarsy ekpe jasaý tártibin túsindirdi, dep habarlaıdy QazAqparat tilshisi.
«Jiti respıratorlyq-vırýstyq ınfektsııasyna toqtalsaq, bul turǵyda aýrýǵa shaldyǵý qaýpi joǵary top bar. Birinshi kezekte halyqtyń álsiz tobyna vaktsına salynady. Olardyń qataryna sozylmaly derti bar jıi aýyratyn 18 jasqa deıingi balalar, júkti áıelder, 60-tan asqan qart adamdar, sondaı-aq jabyq tıptegi mekemelerdegi adamdar (balalar úılerindegi tárbıelenýshiler, medıtsınalyq qyzmetkerler) kiredi. Alǵashqy medıtsınalyq-sanıtarlyq kómek uıymy men óńirlik tıisti departamentter jyl saıyn vaktsınalaý aldynda daıyndyq jumystaryn júrgizedi. Olar adamdardy emhanaǵa shaqyrtady», - dep túsindirdi Jazıra Emberdıeva.
Onyń sózine qaraǵanda, emhanaǵa barǵan kezde patsıentti ýchaskelik dáriger qarap shyǵady. Osy oraıda densaýlyq jaǵdaıyna turǵynnyń shaǵymdary suralyp, dene qyzýy ólshenedi. Eger de dansaýlyǵy qalypty deńgeıde bolsa, onda patsıent tumaýǵa qarsy ekpe saldyrýǵa jiberiledi. Vaktsına qoıylǵannan keıin, patsıent jarty saǵat boıy emhanada baqylaýda bolady. Sonymen qatar, ýchaskelik qyzmet eki kúnniń barysynda beıne baılanys boıynsha adamnyń jaǵdaıyn baqylap otyrady.
«Aldaǵy epıdemıologııalyq kezeńge medıtsınalyq uıymdarǵa JRVI men tumaýmen aýyrǵan adamdardy jatqyzý úshin qosymsha telefondar, avtokólik berildi», - dedi Jazıra Emberdıeva.
