Tumaýǵa qarsy tegin vaktsınany kimder alatyny anyqtaldy
ALMATY. QazAqparat – Bıyl tumaýǵa qarsy vaktsına 10 qyrkúıek pen 10 qarasha aralyǵynda júrgiziledi. Bul týraly Almaty qalasynyń «Almaly aýdany MSAK ortalyǵy» pedıatrııa bóliminiń meńgerýshisi» Maıra Makeeva onlaın brıfıng barysynda aıtty, dep habarlaıdy QazAqparat tilshisi.
Onyń aıtýynsha, tumaýǵa qarsy tegin vaktsına jyl saıyn belgili bir sanattaǵy adamdarǵa salynyp keldi. Bul úrdis bıyl da jalǵasady.
«Biz júkti áıelder (2-3 trımestrde), medıtsınalyq qyzmetkerler men 18 jasqa deıingi sozylmaly aýrýlary bar balalardy, ınternat, balalar úıi sııaqty jabyq mekemelerde ornalasqandardy, sondaı-aq múmkindigi shekteýli jandar men jasy 60-tan asqan azamattardy jyl saıyn tumaýǵa qarsy tegin ekpemen qamtamasyz etip keldik. Bıyl da ár ýchaskelik dáriger osy sanattaǵy azamattardy tegin ekpemen qamtamasyz etý úshin aýrýhanaǵa shaqyratyn bolady», - dedi Maıra Makeeva.
Onyń aıtýynsha, tumaýdyń ózi qaýipti emes. Onyń bakterıaldy asqynýy qaýipti.
«Jyl saıyn álemde tumaýdyń A jáne B túri boıynsha zertteýler júrgizilýde. Nátıjesinde vırýstyń mýtatsııaǵa ushyraıtynyn baıqap otyrmyz. Sondyqtan jyl saıyn da vaktsına jańartylyp otyrady. Bıyl da jańartylǵan vaktsına salynady. Ol Reseıde óndirilgen. Negizi tumaýdyń ózi qaýipti emes. Onyń bakterıaldy asqynýy qaýipti. Nátıjesinde aýrý bakterıaldy pnevmonııaǵa ulasyp ketýi múmkin»,– deıdi ol.
Sondaı-aq, ol tumaýǵa qarsy vaktsınany turǵyndar jaqsy kóteretinin jáne onyń tıimdi ekenin atap ótti.
