Tumaýǵa qarsy tegin vaktsınany kimder ala alady
KÓKShETAÝ. QazAqparat – 1 qazannan bastap Aqmola oblysynda tumaýǵa qarsy ekpe salyna bastaıdy, dep habarlaıdy QazAqparat oblystyq taýar men qyzmet sapasyn jáne qaýipsizdigin baqylaý departamentine silteme jasap.
Tumaýǵa qarsy ımmýndyq sharalardy júrgizý úshin oblys aýmaǵynda 364 arnaıy kabınet ázirlengen. Qater tobynda turǵan azamattarǵa tegin salý úshin 73 860 vaktsına daıyn tur. Jalpy, 9000 ekpe satyp alý úshin jergilikti bıýdjetten 7 mln 830 myń teńge bólingen.
«Grıppol plıýs» atty reseılik vaktsınanyń quramynda aldaǵy epıdemııa maýsymynda juǵýy múmkin A jáne V tıpti tumaý vırýstarynyń ınaktıvatsııalanǵan antıgeni bar. Tumaýǵa qarsy ekpe alý úshin ár adam ózi tirkelgen medıtsınalyq mekemege júginýi kerek» delingen habarlamada.
Tumaýǵa qarsy ekpeni medıtsına qyzmetkerleri, 2-3 trımestrdegi júkti áıelder, sozylmaly aýrýmen dıspanserlik esepte turǵan balalar men eresekter, týǵanyna 6 aıdan asqan jıi aýyratyn náresteler, jabyq mekemeler kontıngenti ala alady.
