Tumaýǵa qarsy ekpeni 400 myń almatylyq alady
ALMATY. QazAqparat – Kúzgi – qysqy kezeńde tumaýǵa qarsy ekpeni 400 myń almatylyq alady. Bul týraly Almaty qalalyq Qoǵamdyq densaýlyq saqtaý basqarmasynyń basshysy Kamaljan Nadyrov onlaın brıfıng barysynda málim etti, dep habarlaıdy QazAqparat tilshisi.
Onyń aıtýynsha, negizgi qaýip tobyna sozylmaly aýrýlary bar adamdar, 65 jastan asqan egde jandar jáne medıtsına qyzmetkerleri kiredi.
«Qyrkúıek aıynyń basynda tumaýǵa qarsy vaktsınatsııa bastalady. Kúzgi-qysqy kezeńde tumaýǵa qarsy ekpeni 400 myń almatylyq alady. Sondaı-aq, 130 myń doza jetkiziledi dep kútýdemiz. «SK-Farmatsııa» JShS biryńǵaı dıstrıbıýtoryna tumaýǵa qarsy vaktsınanyń 300 myń dozasyna qosymsha ótinim berildi»,- dedi Kamaljan Nadyrov.
Sonymen qatar ol tumaýǵa qarsy tegin vaktsınany kimder alatynyn aıtty.
«Medıtsınalyq baqylaýdaǵy balalarǵa, jetim jáne ata-anasynyń qamqorlyǵynsyz qalǵan balalarǵa, júkti áıelderge, sozylmaly júrek-tamyr júıesi aýrýlary bar jáne epıdemıologııalyq kórsetkishter boıynsha tynys alý organdary dertine ushyraǵandar, medıtsına qyzmetkerlerine vaktsına tegin salynady»,– dedi ol.
