Tumaýǵa qarsy vaktsınatsııalaý naýqany: óńirlerge 2,1 mln doza jetkizildi
ASTANA. KAZINFORM - Qazaqstanda maýsymdyq tumaýǵa qarsy vaktsınatsııalaý naýqany bastaldy. Halyqty tegin vaktsınatsııalaý úshin 2,1 mln doza vaktsına satyp alyndy, dep habarlaıdy QR Densaýlyq saqtaý mınıstrliginiń baspasóz qyzmeti.
Vaktsınalardyń alǵashqy 564 myń dozasy elge jetkizilip, óńirlerge kezeń-kezeńimen jóneltile bastady. Vaktsına Almaty, Túrkistan jáne Jetisý oblystaryna, sondaı-aq Almaty jáne Shymkent qalalaryna jetkizildi. Qalǵan óńirlerge vaktsınany jetkizý 5 qazanǵa deıin josparlanǵan.
Vaktsına jetkizilgen medıtsınalyq uıymdarda halyqty ımmýndaý jumystary bastaldy. Vaktsınatsııalaý naýqanyn ótkizý úshin reseılik óndiristiń «Grıppol» vaktsınasy satyp alyndy. Onyń shtamdyq quramy aldaǵy epıdemııalyq maýsymǵa arnalǵan Dúnıejúzilik densaýlyq saqtaý uıymynyń usynymdaryna sáıkes keledi.
Birinshi kezekte tumaýǵa jáne onyń asqynýlaryna barynsha osal halyq toptaryna tegin vaktsınatsııalaý júrgizý kózdelgen. Olardyń qatarynda medıtsına qyzmetkerleri, dıspanserlik esepte turǵan balalar, jetim balalar jáne ata-anasynyń qamqorlyǵynsyz qalǵan balalar, medıtsınalyq-áleýmettik mekemelerdiń kontıngenti men qyzmetkerleri, sondaı-aq epıdemıologııalyq kórsetilimder boıynsha ınfektsııa juqtyrý qaýpi joǵary adamdar bar.
Óńirlerge vaktsınatsııalaý naýqanyn ýaqtyly bastaýdy jáne nysanaly toptar úshin vaktsınatsııalaýdyń qoljetimdiligin qamtamasyz etý tapsyryldy.
Qazan aıy – syrqattanýshylyqtyń maýsymdyq ósýi bastalǵanǵa deıin vaktsınatsııalaý júrgizý úshin ońtaıly kezeń.
-Vaktsına alǵannan keıin organızmge ımmýndyq qorǵanysty qalyptastyrý úshin belgili bir ýaqyt qajet. Vaktsınatsııalaý tumaýmen aýyrý qaýpin, eń aldymen, aýrýdyń aýyr ótýi men asqyný yqtımaldyǵyn tómendetýge múmkindik beredi. Nysanaly toptarǵa jatatyn azamattarǵa vaktsınatsııalaý týraly aqparat alý úshin tirkelgen jeri boıynsha medıtsınalyq uıymdarǵa ýaqtyly júginý usynylady,-delingen habarlamada.
Osyǵan deıin Astanada 2026–2027 jyldardaǵy tumaý maýsymyna daıyndyq júrip jatqany týraly jazdyq. Bıyl qalaǵa tumaýǵa qarsy «Grıppol Plıýs» vaktsınasynyń 169 005 dozasy satyp alynǵan.
