Tumaýdyń órshýin koronavırýs vaktsınasymen baılanystyrý ǵylymı turǵydan negizsiz - mınıstr
«Qazaqstandyqtardyń maýsymdyq tumaýdy aýyr ótkerip jatqanyna koronavırýske qarsy vaktsınany sebepker degen kipirler aıtylyp júr. Ekpe adamdardyń tumaýǵa qarsy ımmýnıtetin tejep tastaǵany ras pa? Bıylǵy tumaýdy halyq nege aýyr ótkerip jatyr?», - dep surady BAQ ókili Ajar Ǵınııattan mınıstrliktiń alqa otyrysynda.
Mınıstrdiń aıtýynsha eldiń tumaýdy aýyr ótkerip jatqanyna vaktsınatsııanyń eshqandaı qatysy joq.
«Búkil dúnıejúzinde jedel respıratorlyq vırýstyq ınfektsııanyń jáne tumaýdyń maýsymdyq artýy bolyp jatyr. Aýyr ótip jatqanyna kelsek, keıingi eki jyl qatarynan adamdar tumaýmen aýyrmaǵandyqtan ol aýrýǵa degen ımmýnıteti joq», - dedi Ajar Ǵınııat.
Sondaı-aq ol elde tumaýdyń artýyn koronavırýs vaktsınasymen baılanystyrý ǵylymı turǵydan da negizsiz degen pikir bildirdi.
«Siz aıtyp otyrǵan joramal ǵylymı turǵydan da durys emes. Óıtkeni adam dúnıege kelgennen bastap, balalardyń ózi 21 ınfektsııaǵa qarsy ár túrli ekpe alady. Ol qandaı da bir aýrýlarǵa kedergi keltirip jatqan joq. Tek tıisti aýrýǵa ǵana qarsy ımmýnıtet qalyptastyryp, sol aýrýǵa ǵana tótep berip, qarsy turyp jatyr. Sondyqtan árbir aıtylǵan aqparatty ǵylymı túrde, saraptamalyq túrde aıtqan durys», - dedi vedomstvo basshysy.
Aıtýynsha, sońǵy eki jylda sanıtarlyq-profılaktıkalyq sharalar kúsheıtilgendikten tumaýdyń taralýy azaıǵan. Al bıyl álem boıynsha qaıta órship jatyr.
«Aýrýlardyń órshýin biz apta saıyn qarap otyrmyz. Qazir maýsymdyq kezeń júrip jatyr. Sol monıtorıngtiń ózi bul aýrýdyń jaılap basylyp kele jatqanyn kórsetip otyr. Bul tek tumaýǵa ǵana emes, koronavırýs ınfektsııasyna da baılanysty. Ony biz jedel járdemniń shaqyrylýynan, aýrýlardyń tirkelýinen, naýqastardyń aýrýhana túsýinen, balalar arasynda aýrýhanaǵa qatań túrde túsý kórsetkishinen kórip otyrmyz. Qazirdiń ózinde búkil respýblıka boıynsha 45 shaqty bala aýrýhanada koronavıýrspen jáne ózge de vırýstyq ınfektsııalarmen jatyr», - dedi mınıstr.