Tumaýdyń aldyn alý úshin sarymsaq jeý kerek - Jandarbek Bekshın

ASTANA. QazAqparat - QR DSM Qoǵamdyq densaýlyq saqtaý komıtetiniń tóraǵasy Jandarbek Bekshın tumaýmen aýyrǵan kezde balany balabaqshaǵa jibermeýge keńes berdi, dep habarlaıdy QazAqparat.

«Bizdiń maqsat -el turǵyndary arasynda bul aýrýdyń aldyn alý. Ońtústik óńirlerde aýrýdyń taralýy dástúrli túrde jeltoqsannyń ekinshi jartysynan, al soltústik óńirlerde qańtardyń ekinshi jartysynan bastalady», - dep toqtaldy Bekshın Astanadaǵy №9 emhanada ótken baspasóz máslıhatynda.

Onyń sózine qaraǵanda, jyl saıyn tumaý men jiti respıratorlyq vırýstyq ınfektsııalardyń 1 mıllıonǵa deıin jaǵdaılary tirkeledi, al ótken jyly 600 myń JRVI jaǵdaıy baıqaldy.

«Sondyqtan da biz aldyn alý sharalaryna erekshe mán berýimiz kerek. JRVI tobyna toqtalatyn bolsaq, adamdar kóp jınalatyn jerlerge barýdy shekteý kerek, ásirese, balalardy. Atap aıtqanda, aýasy jeldetilmeıtin ǵımarattarǵa barýdan tartyný qajet. Osyǵan baılanysty balalar aǵzasyn dárýmendermen barynsha tolyqtarǵan abzal», - deıdi Bas memlekettik sanıtarlyq dáriger.

Bul rette birinshi kezekte dárihanalarda satylatyn jasandy dárýmenderdi, sondaı-aq jemis-jıdekterdi kóbirek tutynǵan durys.

«Balalarǵa lımon, anar, kıvı sekildi ónimderdi berý kerek. Munymen qosa ıtmuryn, qara qaraqat qaınatpalaryn ishken durys, al túnge tabıǵı fıtontsıd bolyp sanalatyn sarymsaq pen pııazdy tutynýǵa keńes beremiz», - dep toqtaldy Bekshın.

Budan bólek ol jeke gıgıena erejesine erekshe mán berý, ǵımarattyń ishin jıi jeldetý qajettigin basa aıtty.

Bas memlekettik sanıtarlyq dáriger otbasynda tumaýǵa shaldyqqan adam paıda bolsa ne isteý kerektigin aıtty.

«Tumaý belgisi bar adam paıda bolsa, basty talap - úıde qalý. Balabaqshaǵa, mektepke, sondaı-aq jumysqa barýdyń qajeti joq. Bul rette «tumaýmen aýyrǵan adamnyń óndiriste paıdasynan góri zııany basym» degen túsinikti nazarǵa alǵan jón. Budan keıin adamdar tumaýdy kóbinese qoǵamdyq kólikte de juqtyrady. Sondyqtan dárigerdi nemese ýchaskelik kómekti shaqyrtqan abzal», - dedi Jandarbek Bekshın.

Onyń aıtýynsha, tumaý taralatyn kezeńde halyqqa qyzmet kórsetý men jedel járdem jumysy kúsheıtiletin bolady.

Budan buryn habarlanǵandaı, aldaǵy dúısenbiden Qazaqstanda tumaýǵa qarsy jappaı vaktsına egý sharalary bastalady .