Tumaýdyń aldyn alý úshin Almaty metrosy ýltrakúlgin sáýlemen óńdeledi (FOTO)
ALMATY. QazAqparat - Almaty metrosynda tumaý jáne jedel-respıratorlyq-vırýstyq ınfektsııanyń aldyn alý maqsatynda ýltrakúlgin sáýlesimen óńdeý sharasy qolǵa alyndy. Bul týraly búgin «Metropolıten» memlekettik kásipornynyń baspasóz qyzmeti habarlady.
«Almaty metrosynda jolaýshylar legi táýligine 40 myń adamǵa ulǵaıdy. Sondyqtan, jolaýshylardyń qaýipsizdigin saqtaý maqsatynda barlyq qajetti sharalar júzege asyrylyp jatyr.
Kún saıyn metro beketteri men poıyzdary arnaıy zattarmen zalalsyzdandyrylady. Oryndyqtar, tutqalar men týrnıketter qolmen jýylady. Qazir vagondardy qosymsha bakterıtsıdtik shamdarmen óńdeý jumysy qolǵa alyndy», - dedi osyǵan oraı «Metroplıten» memlekettik kásipornynyń dırektory Aıdyn Orazhanov.
Odan basqa, metropolıtende qyzmetkerlerdiń densaýlyǵy boıynsha medıtsınalyq baqylaý kúsheıtildi. Metro beketterinde medıtsınalyq pýnktter jumys isteıdi. Onda metropolıtenniń barlyq qyzmetkerleri indetke qarsy dári-dármekter (oksolın maıy), bir rettik qorǵanys betperdesin, ottegi kokteıli jáne dárýmender ala alady.
Kún saıyn jer asty transportynyń qyzmetkerleri aýysym aldynda, reıs aldynda jáne sońynda medıtsınalyq tekserýlerden ótedi. Tumaý nemese jedel-respıratorlyq-vırýstyq ınfektsııa juqtyrǵan qyzmetkerler jumysqa shyǵarylmaıdy.
Aıta ketelik, «Metropolıten» memlekettik kásipornynda qyzmetkerlerdiń densaýlyǵyn nyǵaıtý maqsatynda dene shynyqtyrý-saýyqtyrý ortalyǵy jumys isteıdi. Onda júzý, fýtbol, voleıbol, trenajer zaly, ústel tennısi úıirmeleri bar jáne sheıpıng baǵdarlamasy júzege asyrylady.
