Tumaý men JRVI kórsetkishi ótken jylmen salystyrǵanda 19%-ǵa tómendedi

ASTANA. KAZINFORM – Bıyl elimizde jedel respıratorlyq vırýsty ınfektsııalar (JRVI) men tumaý boıynsha epıdemıologııalyq jaǵdaı qalypty deńgeıde. Bul týraly QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń tóraǵasy Sarhat Beısenova Ortalyq kommýnıkatsııalar qyzmetinde ótken baspasóz konferentsııasynda málim etti.

- Jyl saıyn elimizde 4 mıllıonǵa deıin JRVI jáne 2 myńǵa deıin tumaý tirkeledi. Bul qalypty qubylys ekenin atap ótkim keledi. Mınıstrlik tumaý men JRVI boıynsha epıdemıologııalyq jaǵdaıdy apta saıyn baqylaýda ustaıdy. Qazirgi ýaqytta el aýmaǵyndaǵy ahýal kúzgi-qysqy kezeńge tán epıdemıologııalyq protsess sheńberinde damyp keledi, – dedi S. Beısenova.

Onyń aıtýynsha, bıylǵy jyldyń qyrkúıeginen bastap 1 278 745 JRVI jaǵdaıy tirkelgen, bul ótken jyldyń osyndaı kezeńimen salystyrǵanda 19%-ǵa tómen (2024-2025 epıdemııalyq maýsymynda – 1 521 680 jaǵdaı). 14 jasqa deıingi balalar arasynda 848 761 jaǵdaı tirkelip, bul jalpy syrqattaný jaǵdaıynyń 66,4%-yn qurap otyr.

Sonymen qatar bıyl 30 qazan men 5 qarasha aralyǵynda respýblıka boıynsha 150 605 JRVI jaǵdaıy tirkeldi. Epıdemııalyq maýsymnyń basynan beri A (H3N2) tıpindegi tumaýdyń 304 zerthanalyq rastalǵan jaǵdaıy anyqtaldy, onyń ishinde 173 jaǵdaı (57%) – 14 jasqa deıingi balalar arasynda.

- Bıyl tumaý vırýsynyń aınalymy ótken maýsymmen salystyrǵanda erterek bastaldy. Eger ótken jyly alǵashqy jaǵdaılar qarasha aıynda tirkelse, bıyl qazan aıynyń basynda anyqtala bastady, – dedi komıtet tóraǵasy.

Eske salsaq, 23-29 qazan aralyǵynda elimizde jiti respıratorlyq vırýsty ınfektsııalardyń 106 930 jaǵdaıy tirkelgen. Bul 108 513 jaǵdaı tirkelgen ótken epıdemıologııalyq maýsymnyń uqsas kezeńiniń kórsetkishinen 1,5%-ǵa tómen ekenin jazǵanbyz.