Tumaý men JRVI: elordadaǵy emhanalarda «fıltr-kabınet» jumys isteıdi
ASTANA. KAZINFORM – Qalanyń árbir emhanasynda JRVI belgileri bar naýqastardy qaraýǵa arnalǵan fıltr-kabınetter men jedel kómek kabınetteri jumys isteıdi, onda ekspress-dıagnostıka júrgizilip, qajet bolǵan jaǵdaıda em taǵaıyndalady. Bul týraly Astana qalasy ákimdiginiń baspasóz qyzmeti habarlady.
Kúzgi-qysqy kezeń bastalǵan saıyn ótkir respıratorlyq vırýstyq ınfektsııalar (JRVI) men tumaýǵa shaldyqqan naýqastar sany kóbeıetini qalypty jaǵdaı. Infektsııanyń taralýyn boldyrmaý maqsatynda qalalyq dárigerler turǵyndarǵa aldyn alý sharalaryn saqtaý jáne ýaqytyly medıtsınalyq kómekke júginý qajettigin eske saldy.
Dene qyzýy kóterilip, jótel, tamaq aýryp, muryn bitelip, jalpy álsizdik baıqalǵan jaǵdaıda dárigerler ózdiginen emdelýge emes, tirkelgen jerindegi bastapqy medıtsınalyq-sanıtarlyq kómek (BMSK) uıymdaryna júginý týraly keńes berdi.
Qalanyń árbir emhanasynda JRVI belgileri bar naýqastardy qaraýǵa arnalǵan fıltr-kabınetter men jedel kómek kabınetteri jumys isteıdi, onda ekspress-dıagnostıka júrgizilip, qajet bolǵan jaǵdaıda em taǵaıyndalady.
Fıltr-kabınetter men jedel kómek kabınetteriniń jumys kestesi:
* jumys kúnderi – 08:00-20:00;
* demalys jáne mereke kúnderi – 08:00-18:00.
Sonymen qatar, BMSK uıymdarynda úıde medıtsınalyq kómek kórsetýge arnalǵan mobıldi brıgadalar jumys isteıdi.
Qabyldanatyn aldyn alý sharalary:
* adamdar kóp jınalatyn oryndardan aýlaq bolý;
* bólmelerdi jıi jeldetip, ylǵaldy tazalyq júrgizý;
* jeke gıgıena erejelerin saqtaý, kósheden kelgennen keıin qol jýý;
* ımmýnıtetti nyǵaıtý, durys tamaqtaný, uıqy men demalys rejımin saqtaý;
* jótelgende nemese túshkirgende aýyz ben muryndy bir rettik súlgimen nemese shyntaqpen jabý;
* jaǵdaıy nasharlasa, úıde qalý jáne medıtsınalyq kómekke júginý.
Aıta ketelik Pavlodarda balalar arasynda vırýsty ınfektsııa órship, aýrýhana naýqastarǵa tolyp qalǵany týraly jazǵan edik.