Tumaý maýsymy: Respýblıka boıynsha 132 mekteptiń 1469 synyby qashyqtan oqýǵa kóshken

ASTANA. KAZINFORM – Bas sanıtar dáriger – Sanıtarlyq-epıdemıologııalyq baqylaý komıtetiniń tóraǵasy Sarhat Beısenova ortalyq kommýnıkatsııalar qyzmetinde ótken baspasóz máslıhatynda onlaın oqýǵa kóshken synyptardyń sanyn atady.

- Búgin tańerteń alǵan málimet boıynsha qashyqtan oqý formatyna kóshý týraly sheshim 7 óńirde qabyldanǵan. Búkil respýblıka boıynsha 1469 synyp qashyqtan oqýǵa kóshken. Mektep emes, synyp bul. 132 mektepte osynsha synyp qashyqtan oqýǵa kóshken. Astana qalasynda 24 mektepte 182 synyp, Shyǵys Qazaqstan oblysynda 57 mekteptiń 204 synyby, Abaı oblysynda 21 mekteptiń 276 synyby, Jambyl oblysynda 14 mekteptiń 598 synyby, Qostanaı oblysynda 12 mekteptiń 168 synyby, Aqmola oblysynda 3 mekteptiń 31 synyby, Qaraǵandy oblysynda 1 mekteptiń 20 synyby onlaın oqýǵa jiberildi, - dedi Sarhat Beısenova.

Sondaı-aq, ol oqýshylardy qashyqtan oqýǵa jibermeı bir synypta ǵana oqytý arqyly aýrýshańdyqty aýyzdyqtaýǵa bolatynyn aıtty.

- Bas sanıtar dárigerdiń 28 tamyzdaǵy qaýlysynda oqýshylardy qashyqtan oqytýǵa jiberýdiń eki ólshemsharty bar. Birinshisi boıynsha synyptaǵy oqýshylardyń 20 paıyzynan astam aýyrsa, sol synypta ǵana kabınette oqý júrgizýge bolmaıdy. ıAǵnı, oqýshylar mektepte bir kabınette ǵana bolady. Kabınetten- kabınetke kóship júrmeıdi. Ekinshi ólshemshart onlaın oqytýǵa baılanysty. Eger synyptyń 30 paıyzdan astamy bir ınkýbatsııalyq kezeńde dál osy jiti respıratorlyq vırýs sımptomdary boıynsha aýyrsa, sol synyp onlaın oqýǵa jiberiledi, - dedi Bas sanıtar dáriger.

Buǵan deıin Densaýlyq saqtaý mınıstri Aqmaral Álnazarova bıyl vırýstardyń órshýi jeltoqsannyń ortasyna deıin jalǵasýy múmkin ekenin aıtqan edi.