Tumaý maýsymy: kimder tegin ekpe ala alady
ASTANA. KAZINFORM — Astanada 2026–2027 jyldardaǵy tumaý maýsymyna daıyndyq júrip jatyr. Bıyl qalaǵa tumaýǵa qarsy «Grıppol Plıýs» vaktsınasynyń 169 005 dozasy satyp alyndy. Ekpe kimderge tegin salynady jáne ony aqyly túrde qaıdan alýǵa bolady?
Bul týraly Astana qalasynyń Sanıtarııalyq-epıdemıologııalyq baqylaý departamentiniń basshysy Aıgúl Shaǵaltaeva elordalyq Kommýnıkatsııalar qyzmetinde ótken brıfıngte málim etti.
Onyń aıtýynsha, 2026–2027 jyldardaǵy epıdemııalyq maýsymda tumaý, jiti respıratorlyq vırýstyq ınfektsııalar (JRVI) jáne COVID-19 ınfektsııasynyń taralýyna jol bermeý úshin birqatar profılaktıkalyq shara qolǵa alynady.
— Aldaǵy epıdemııalyq maýsymda tumaýǵa qarsy ekpe júrgizý úshin Astana qalasynyń Qoǵamdyq densaýlyq saqtaý basqarmasy jergilikti bıýdjet qarajatyna Reseıde óndirilgen «Grıppol Plıýs» vaktsınasynyń 169 005 dozasyn satyp aldy, — dedi Aıgúl Shaǵaltaeva.
Kimder tegin ekpe alady
Úkimettiń 2020 jylǵy 24 qyrkúıektegi № 612 qaýlysyna sáıkes tumaýǵa qarsy ekpe tegin salynatyn birneshe sanat bar.
Olar:
• medıtsınalyq uıymda dıspanserlik baqylaýda turǵan balalar;
• jetim balalar jáne ata-anasynyń qamqorlyǵynsyz qalǵan balalar;
• medıtsınalyq-áleýmettik mekemelerdegi adamdar;
• osy mekemelerdiń qyzmetkerleri.
Sonymen qatar tumaý juqtyrý qaýpi joǵary adamdarǵa da ekpe alý usynylady. Olardyń qatarynda júkti áıelder, medıtsına qyzmetkerleri, pedagogter, áskerı qyzmetshiler, júrek-qan tamyrlary men tynys alý júıesiniń sozylmaly aýrýlary bar adamdar jáne 65 jastan asqan turǵyndar bar. Ekpe erikti túrde salynady.
Ekpeni qaıdan alýǵa bolady
Jergilikti bıýdjet qarajatyna satyp alynǵan vaktsına Astanadaǵy 41 alǵashqy medıtsınalyq-sanıtarııalyq kómek uıymynda salynady. Onyń ishinde 15 emhana, dárigerlik ambýlatorııalar, otbasylyq densaýlyq ortalyqtary jáne basqa da medıtsınalyq uıymdar bar.
Al tumaýǵa qarsy ekpeni aqyly túrde alǵysy keletin turǵyndar «Open klınık» medıtsınalyq ortalyǵyna júgine alady. Munda da Reseıde óndirilgen «Grıppol Plıýs» vaktsınasy salynady.
Tumaýdan qalaı saqtanýǵa bolady
Aıgúl Shaǵaltaeva syrqattanýshylyq kóbeıgen kezde qarapaıym saqtyq sharalaryn ustanýǵa keńes berdi.
— Infektsııanyń taralý qaýpin azaıtý úshin qoǵamdyq oryndarda maska taǵyńyz, adam kóp jınalatyn jerlerge barýdan aýlaq bolyńyz jáne múmkindiginshe naýqas adamdarmen qarym-qatynasty shekteńiz. Bul ásirese balalar, egde jastaǵy adamdar jáne sozylmaly aýrýy bar adamdar úshin mańyzdy. Qoldy antıseptıkpen jıi tazalap otyrý qajet, — dedi ol.
Departament basshysy aýrýdy emdegennen góri onyń aldyn alý ońaı ekenin eske salyp, turǵyndardy ózderin jáne jaqyndaryn qorǵaýǵa shaqyrdy.
Buǵan deıin Astanada balalar arasynda JRVI-men syrqattaný 24%-ǵa óskeni habarlanǵan edi.
