Tumaý maýsymy: el qalalarynda lımon men bal baǵasy qansha

Tumaý maýsymy bastalǵan kezde adamdar shaıǵa bal men lımon qosyp ishkendi jón kóredi. Dárigerlerdiń aıtýynsha, bul ózdiginen aýrýdan aıyqtyra almaıdy, biraq em-dom kezinde qosymsha kúsh beredi. Lımonnyń quramynda S dárýmeni bar. Bul ımmýndyq júıeniń jumysyn retteıdi. Al shaıǵa qosylǵan bal tamaqty jibitip, jóteldi basýǵa septigin tıgizedi.

Tumaý maýsymy bastalǵan kezde bal men lımonǵa suranys artatyny sózsiz. Bul baǵaǵa da óz áserin tıgizedi. Taǵy bir eskeretin jaıt, Qazaqstanda lımon ımporttalatyn ónim sanalady, ıaǵnı tasymal ózindik qunǵa áser etedi. Al bal baǵasy surpyna, óńirlerdegi óndirýshiler men kólemine qaraı ózgerip otyrady. Іri sýpermarketterde turǵan balǵa qaraǵanda jergilikti óndirýshilerdiń ónimi qoljetimdi.

Qazaqstanda lımonnyń kelisi 900 teńgeden bastalyp, 3 600 teńgege deıin jetti. Baǵa surpyna jáne óndirýshi elge qaraı ózgerip otyrady. Keıbir óńirde lımondy túıirlep satady. Mysaly, Almatyda lımonnyń bir danasy 299-600 teńge aralyǵynda bolady.

Baǵany salystyra kele, elimiz boıynsha lımon Oral men Petropavl qalalarynda tómen ekenin bildik. Kelisi 900 teńgeden bastalady. Qostanaıda — 1 000 teńge. Elimiz boıynsha lımonnyń ortasha baǵasy — 1 100-1 300 teńge aralyǵynda. Mundaı baǵa Qyzylorda men Óskemende (1 100 teńgeden bastap), Astanada (1 145 teńgeden bastap), Kókshetaýda (1 155 teńgeden bastap), Almatyda (1 169 teńgeden bastap), Shymkentte (1 180 teńgeden bastap), Qaraǵandy men Túrkistanda (1 200 teńgeden bastap), sonymen birge Aqtóbede (1 300 teńgeden bastap) tirkeldi. Semeı (1 485 teńgeden bastap), Jezqazǵan men Tarazda (1 500 teńgeden bastap) baǵa odan sál joǵary. Al Pavlodarda lımonnyń kelisi 1 900 teńge, Taldyqorǵan men Aqtaýda 2 000 teńgeden bastalady.

Sonymen birge bal baǵasy da surpyna qaraı ózgerip otyrady. Baǵany naqty anyqtaý úshin biz gúl balynyń qunyn bildik. Eń tómen baǵa Qostanaıda tirkeldi. Munda baldyń kelisi — 1 500 teńge. Habarlandyrý saıttaryndaǵy aqparatqa súıensek, baldyń osynyń túriniń baǵasy elimizdiń basym bóliginde tómen. Tek ony 10-15 keli etip kóterme baǵada alý kerek. Qostanaıda tabıǵı baldyń basqa da túrleri bar. Kelisi 3 000 teńgeden bastalady.

Qazaqstanda baldyń ortasha baǵasy shamamen 2 000-4 000 teńge aralyǵynda. Al sýpermarketterde onyń baǵasy 6 000-7 000 teńge aralyǵynda bolyp tur.

Bal baǵasy Taraz, Shymkent, Túrkistan men Semeıde 2 000 teńge. Al Qyzylorda, Aqtóbe, Taldyqorǵan men Almatyda shamamen 2 300-2 500 teńge aralyǵynda. Qaraǵandy, Oral, Kókshetaý, Petropavl men Óskemen qalalarynda baldyń kelisi 3 000-3 500 teńge bolyp tur. Baldyń kelisi Astanada 3 990 teńgeden, Pavlodar, Jezqazǵan men Aqtaýda 4 000 teńgeden bastalady.

Aldyńǵy aptada Qazaqstan qalalaryndaǵy teńiz ónimderiniń baǵasy týraly jazyldy.