Tumaý qaýpi kúsheıdi: Mońǵolııada el boıynsha qashyqtan oqytý engizilýi múmkin

ASTANA. KAZINFORM — Mońǵolııa premer-mınıstri Gombojavyn Zandanshatar búgin Densaýlyq saqtaý mınıstrligi men Bilim mınıstrliginiń ókilderimen kezdesip, mekteptegi demalysty merziminen buryn bastaý jónindegi máseleni talqylady, dep habarlaıdy Montsame.

Densaýlyq saqtaý mınıstrliginiń resmı ókilderi ulttyq táýekel baǵalaýyn tanystyryp, bıyl 15 jeltoqsanǵa qaraı tumaý men tumaýǵa uqsas aýrýlardyń órship turǵanyn habarlady. Osyǵan baılanysty bastaýysh synyptarda demalysty josparlanǵan merzimnen 14 kún buryn jarııalaý nemese qashyqtan oqytýǵa kóshý usynyldy. Alaıda Bilim mınıstrligi bul usynysty birden qabyldaı almaıtynyn atap ótti.

Taraptardyń pikirin tyńdaǵan premer-mınıstr Zandanshatar barlyq deńgeıde ınfektsııadan qorǵaný tártibi men sharalaryn birinshi kezekte qamtamasyz etýdi tapsyrdy. 

— Osy aptada barlyq deńgeıdegi uıymdar profılaktıkalyq sharalardy jaýapkershilikpen qabyldaýy tıis. Eger syrqattaný deńgeıi tómendese, demalys jospar boıynsha bastalady. Al eger syrqattaný deńgeıi tómendemeı, óse berse, kelesi jeti kún ishinde oqý qashyqtan júrgizilýi kerek, — dedi Premer-mınıstr.

Premer-mınıstr sondaı-aq Bilim mınıstrligine, eger oqý onlaın-rejımge aýyssa, bilim berý protsesiniń sapasy men turaqtylyǵyn qamtamasyz etý úshin Tsıfrlyq damý, ınnovatsııalar jáne kommýnıkatsııalar mınıstrligimen jáne mobıldi baılanys operatorlarymen birlesip jumys isteýdi tapsyrdy.

Kezdesý barysynda premer-mınıstr azamattardy dúrliktirmeý kerektigin basa aıtty.

— Eń bastysy azamattardy dúrliktirmeý, olardy durys uıymdastyrý jáne aýrýhanalarǵa túsetin júktemeni shuǵyl túrde azaıtý. Azamattarǵa jedel qyzmet kórsetińizder, onlaın qabyldaýǵa jazylýdy, keńes berý úshin jedel jelilerdi paıdalanyńyzdar. Dáriger qabyldaýyn uzaq kútý máselesin sheshý úshin Densaýlyq saqtaý mınıstrligine qabyldaý pýnktterin ashý qajettigin erekshe eskertkim keledi, — dedi ol.

Aıta ketelik Qostanaıda barlyq mektep qashyqtan oqıtyn boldy.