Tumaý 1,9 ese tómendedi, epıdemıologııalyq jaǵdaı turaqtandy - DSM

ASTANA. KAZINFORM — Densaýlyq saqtaý mınıstrligi eldegi ınfektsııalyq aýrýlar boıynsha ahýaldyń turaqtanǵanyn habarlady. 

Bıylǵy epıdemıologııalyq maýsym bastalǵaly JRVI-dyń 150,7 myń jaǵdaıy tirkeldi, bul ótken maýsymnyń uqsas kezeńimen salystyrǵanda 1,9 ese tómen. Aǵymdaǵy maýsymda tumaý jaǵdaılary tirkelgen joq.

Mınıstrliktiń málimetinshe, 2025 jyldyń 8 aıynda kóptegen ınfektsııalyq aýrýlar boıynsha jaǵdaı turaqty qalypta qaldy.

Juqpaly aýrýlardyń tirkelmeýi. Júrgizilip jatqan profılaktıkalyq jáne epıdemııaǵa qarsy is-sharalardyń nátıjesinde elde 21 ınfektsııa anyqtalǵan joq. Olardyń qatarynda oba, tyrysqaq, dıfterııa, polıomıelıt, ish súzegi jáne paratıf bar. Sonymen birge 33 ınfektsııa boıynsha syrqattanýshylyq aıtarlyqtaı tómendedi.

Aıtarlyqtaı tómendegenderi:

– qyzylsha – 11 ese;
– kókjótel – 8,1 ese;
– A vırýstyq gepatıti – 2,5 ese;
– koronavırýs ınfektsııasy – 1,6 ese.

Parazıttik jáne ishek ınfektsııalary boıynsha da jaqsarý baıqalady. Qyzylsha ahýaly turaqtanyp keledi: bir jyl burynǵy 27 856 jaǵdaımen salystyrǵanda qazir 2 569 jaǵdaı tirkelgen.

Degenmen tirkelgen derekterdiń shamamen 76%-y – vaktsınatsııalanbaǵandar. Kókjótelde de uqsas kórinis: jaǵdaılardyń 89%-y ekpe almaǵan adamdarǵa tıesili.

QR Densaýlyq saqtaý mınıstrligi ata-analardy balalarǵa josparly vaktsınatsııany ýaqytyly jasatýǵa shaqyryp, ekpelerdiń juqpaly aýrýlardyń aldyn alýdaǵy mańyzyn eske salady.

Dárigerlerdiń usynymdary:

• adamdar kóp jınalatyn jerlerde maska jáne antıseptıkterdi paıdalaný;
• úı-jaılardy jıi jeldetip, jeke gıgıena erejelerin saqtaý;
• teńgerimdi tamaqtaný arqyly ımmýnıtetti nyǵaıtý;
• alǵashqy belgiler baıqalǵanda ýaqtyly medıtsınalyq kómekke júginý.

Medıtsınalyq uıymdar 5,7 myń oryndyq tósek qorymen (onyń ishinde ınfektsııalyq tósekterdiń rezervi bar) qamtamasyz etilgen. Vırýsqa qarsy preparattardyń, jeke qorǵanys quraldarynyń jáne qarqyndy terapııaǵa qajetti jabdyqtardyń qory jasaqtaldy.

Aıta keteıik, SQO-da skrınıngiden ótken ár úshinshi adamnan týberkýlez ınfektsııasy anyqtaldy.