«Tumar» jáne «Úrker» syılyqtaryna ótinim qabyldaý merzimi uzartyldy
ASTANA. KAZINFORM – Qazaqstan Media Awards aıasyndaǵy «Tumar» jáne «Úrker» mereıtoılyq ulttyq syılyqtaryna ótinim qabyldaý merzimi 2026 jylǵy 6 qazanǵa deıin uzartyldy. Bul týraly Mádenıet jáne aqparat mınıstrligi habarlady.
Ótinimder baıqaýdyń resmı QMA.kz saıty arqyly joldanady.
Baıqaýǵa 2025 jylǵy 18 qyrkúıek pen 2026 jylǵy 18 qyrkúıek aralyǵynda jarııalanǵan nemese efırge shyqqan jumystar qabyldanady. Ulttyq syılyqtar baıqaýyna qazaqstandyq jýrnalıster, telejúrgizýshiler, medıajoba avtorlary men jasaýshylary, redaktsııalar jáne shyǵarmashylyq ujymdar qatysa alady.
Baıqaý nomınatsııalary:
Televızııalyq jýrnalıstıka:
1. Úzdik telejúrgizýshi
2. Úzdik televızııalyq materıal (reportaj, suhbat)
3. Úzdik teleserıal
4. Úzdik aqparattyq-taldamalyq baǵdarlama
5. Úzdik derekti joba
6. Qoǵamdyq jaýapkershilik salasyndaǵy úzdik joba («Zań men tártip», «Taza Qazaqstan»)
Baspa, ınternet jáne radıo jýrnalıstıkasy:
1. Jyldyń úzdik jýrnalısi
2. Jyldyń úzdik materıaly (suhbat, reportaj, maqala)
3. Úzdik taldamalyq materıal
4. Úzdik medıajoba (YouTube, podkast)
5. Úzdik radıojoba
6. Jýrnalıstıkanyń bolashaǵy: jasandy ıntellekt salasyndaǵy úzdik joba
2026 jyly jańa tehnologııalar men jýrnalıstıkanyń bolashaǵyna aıryqsha mán berilip otyr. Bıyl alǵash ret jasandy ıntellekt salasyndaǵy jobalarǵa arnalǵan nomınatsııa engizildi. Bul medıadaǵy jańa tehnologııalardyń qoldanysyn jáne osy baǵyttaǵy tyń jobalardy qamtıdy.
Baıqaý jumystaryn tanymal jýrnalıster, salaǵa eńbegi sińgen mamandar men medıa sarapshylardan quralǵan táýelsiz qazylar alqasy baǵalaıdy.
2026 jyly ulttyq syılyqtardyń 10 jyldyǵyna oraı «Tumar» jáne «Úrker» alǵash ret Qazaqstan Media Awards aıasynda ótip jatyr. On jyl ishinde qos syılyq otandyq medıa salasyndaǵy aıtýly jobalardyń birine aınalyp, jýrnalıstıka men medıanyń damýyna úles qosqan jýrnalısterdi, redaktsııalar men medıajobalardy jyl saıyn marapattap keledi.
Kazinform tilshisi «Úrker» ulttyq syılyǵyna nomınant bolǵanyn jazǵan edik.
