«Tumar» jáne «Úrker» mereıtoılyq ulttyq syılyqtaryna ótinim qabyldaý bastaldy
ASTANA. KAZINFORM — Osy jyly «Tumar» jáne «Úrker» ulttyq syılyqtary na 10 jyl tolady. Mereıtoılyq shara Qazaqstan Media Awards aıasynda ótedi.
Ótkizilip kele jatqan jyldar ishinde «Tumar» jáne «Úrker» ulttyq syılyqtary Qazaqstannyń medıa salasynyń mańyzdy bóligine aınalyp, otandyq jýrnalıstıka men medıanyń damýyna úles qosqan jýrnalısterdi, redaktsııalardy jáne jobalardy jyl saıyn atap ótip keledi.
Mereıtoılyq is-shara syılyqtar tarıhyndaǵy erekshe kezeń bolmaq. Óıtkeni osy joly «Tumar» jáne «Úrker» syılyqtary alǵash ret Qazaqstan Media Awards aıasynda birigedi.
Qazaqstan Respýblıkasy Mádenıet jáne aqparat mınıstrliginiń bastamasymen uıymdastyrylatyn konkýrsqa medıakontent óndirýmen jáne taratýmen aınalysatyn respýblıkalyq jáne óńirlik telearnalar, radıostantsııalar, baspa jáne ınternet-basylymdar qatysa alady.
Konkýrsqa 2025 jylǵy 18 qyrkúıekten bastap 2026 jylǵy 18 qyrkúıekti qosa alǵandaǵy kezeńde jarııalanǵan nemese efırge shyqqan jumystar qabyldanady. Baıqaýǵa qazaqstandyq BAQ jýrnalısteri, telejúrgizýshiler, medıajobalardyń avtorlary men jasaýshylary, redaktsııalar jáne shyǵarmashylyq ujymdar qatysa alady.
Konkýrsqa qatysýǵa ótinimder 2026 jylǵy 18 qyrkúıek pen 2 qazan aralyǵynda qosa alǵanda QMA.kz syılyqtyń resmı saıtynda eki negizgi baǵyt boıynsha qabyldanady.
Televızııalyq jýrnalıstıka
- Úzdik telejúrgizýshi
- Úzdik televızııalyq materıal (reportaj, suhbat)
- Úzdik teleserıal
- Úzdik aqparattyq-taldamalyq baǵdarlama
- Úzdik derekti joba
- Qoǵamdyq jaýapkershilik salasyndaǵy úzdik joba («Zań men tártip», «Taza Qazaqstan»)
Baspa, ınternet jáne radıo jýrnalıstıkasy
- Jyldyń úzdik jýrnalısti
- Jyldyń úzdik materıaly (suhbat, reportaj, maqala)
- Úzdik taldamalyq materıal
- Úzdik medıajoba (YouTube, podkast)
- Úzdik radıojoba
- Jýrnalıstıkanyń bolashaǵy: jasandy ıntellekt salasyndaǵy úzdik joba
2026 jyly jýrnalıstıkanyń bolashaǵy men jańa tehnologııalarǵa erekshe nazar aýdarylady. Medıa salasynyń jańa damý baǵyttaryn kórsetetin jasandy ıntellekt salasyndaǵy jobalarǵa arnalǵan nomınatsııa alǵash ret engizilip otyr.
Konkýrstyq jumystardy baǵalaýdy belgili jýrnalısterden, salanyń eńbek sińirgen qaıratkerleri men medıa sarapshylardan quralǵan táýelsiz qazylar alqasy júzege asyrady.
Aıta ketelik memlekettik til taqyrybyndaǵy baıqaýda Kazinform tilshisi júldeger atanǵan edi.
