«Tumar» Ulttyq televızııalyq báıgesine ótinimderdi qabyldaý bastaldy

ASTANA. QazAqparat - 18 qańtar kúni «Tumar» ІІ Ulttyq televızııalyq syılyǵyna qatysýǵa ótinimderdi qabyldaý bastaldy, dep habarlaıdy QazAqparat QR Aqparat jáne kommýnıkatsııalar mınıstrliginiń baspasóz qyzmetine silteme jasap.

Báıgege 2017 jyly efırge shyqqan biregeı televızııalyq jobalar qatysady. Oǵan televızııalyq ónim jasap otyrǵan ulttyq jáne aımaqtyq telekompanııalar, stýdııalar, prodıýserlik ortalyqtar jáne basqa da medıa óndiris uıymdary ótinim bere alady. Ótinimder 2018 jyldyń 1 naýryzyna deıin qabyldanady.

Bıylǵy jeńimpazdar mynadaı nomınatsııalar boıynsha marapattalady: úzdik derekti kıno, úzdik televızııalyq serıal, úzdik áleýmettik joba, úzdik aqparattyq baǵdarlama, úzdik óńirlik telearna, úzdik aǵartýshylyq baǵdarlamasy, televızııalyq maýsymnyń úzdik oqıǵasy, «Televıdenıeniń 60 jyldyǵy» - televıdenıege qosqan úlesi úshin jáne úzdik oıyn-saýyq jobasy.

Sonymen birge, úzdik rejısserlik jumys, úzdik operatorlyq jumys, jyldyń úzdik telejúrgizýshisi men jyldyń úzdik telejýrnalısine syılyqtar tabys etiledi. Elordanyń 20 jyldyǵyna oraı - Astana týraly úzdik joba syılyǵy da taǵaıyndalyp otyr.

Ádilqazylar alqasy jiberilgen materıaldardy saraptamalyq baǵalaý nátıjesi boıynsha, jasyryn daýys berý arqyly laýreattardy anyqtaıdy. Ádilqazylar alqasy qazaqstandyq televıdenıeniń bilikti kásibı mamandarynan quralady.

«Tumar» Ulttyq televızııalyq báıgesin QR Aqparat jáne kommýnıkatsııalar mınıstrligi elimizdiń eń sapaly jáne ózekti ónimin anyqtaý arqyly qazaqstandyq sapaly televıdenıeni damytý, ilgeri jyljytý, televızııalyq ónim jasaýshy talantty kásibı mamandardy qoldaý maqsatynda bekitken edi.

Báıgeni QR Aqparat jáne kommýnıkatsııalar mınıstrliginiń qoldaýymen «Qazmedıa ortalyǵy» uıymdastyrady.

Tolyqqandy aqparatty báıgeniń resmı saıtynan alýǵa bolady.