«Tumar» ulttyq televızııalyq báıgesi týraly 10 derek
ASTANA. QazAqparat - Medıa salasyndaǵy aıtýly oqıǵaǵa aınalǵan «Tumar» ulttyq televızııalyq báıgesi osymen ekinshi ret uıymdastyryldy. Saltanatty shara qatysýshylary qyzyl kilemmen júrip ótti, jeńimpazdar kópten kútken júldelerin aldy, qýanyshty sátter jyly estelikterge aınaldy.
Bıyl Qazaq televızııasynyń 60 jyldyǵyna oraı ótkizilgen «Tumar» - 2018 aıryqsha daıyndyqty talap etti. Uıymdastyrýshylar birneshe aı boıy úzdiksiz eńbek etti.
Qazmedıa ortalyǵy «Tumar»-2018 báıgesi týraly TOP-10 derekti usynady.
1. Bıyl televızııalyq báıgeniń 14 atalymy boıynsha konkýrstyq jumystardy qabyldaý 15 qańtar men 1 naýryz aralyǵynda júrgizildi. Olardyń ishinde qazaq televızııasynyń 60 jyldyǵy men Astananyń 20 jyldyǵyna arnalǵan erekshe nomınatsııalar bar.
2. Qazmedıa ortalyǵynda Qazaqstandaǵy televızııanyń damý tarıhyna, ótkenine, búgini men bolashaǵyna arnalǵan kórme qoıyldy. Onda Dańq alleıasy, Almatydaǵy Kóktóbede ornalasqan telemunara maketi boldy.
3. Alǵash ret bıylǵy marapattaýda «Úzdik operatorlyq jumys», «Úzdik rejısserlik jumys», «Jyldyń úzdik telejýrnalısi», «Jyldyń úzdik telejúrgizýshisi» syndy jekelegen atalymdarda úmitkerlerdiń kóńil-kúıleri ekrannan qatar kórsetildi.
4. «Tumar» báıgesine ótinimderdi qabyldaý avtomattandyrylǵan jáne kaztube.kz portalynda júrgiziledi. Bul kezeńde portal qaralym deńgeıi 80 % artty, ótinimder sany byltyrǵymen salystyrǵanda 1,6 esege kóbeıgen (2017 jyly 240 ótinim tússe, 2018 jyly - 397). Nátıjesinde, barlyq talaptarǵa saı toltyrylǵan 355 ótinim qazylar alqasynyń qaraýyna jiberildi.
5. Baıqaýdyń ádil ótýi jáne geografııalyq jaǵynan barynsha qamtylýy úshin konkýrstyq jumystar kaztube.kz portaly arqyly júrgizildi. «Qazkontent» AQ táýlik boıy tehnıkalyq qoldaý kórsetti.
6. Bıylǵy qatysýshylardyń belsendiligi joǵary boldy. 27 jáne 28 aqpan jáne 1 naýryz kúnderi 306 konkýrstyq jumys kelip túsken. Qazmedıa ortalyǵynyń Medıa-mektebi konkýrstyq ótinimderdi qabyldaý, qazylar alqasynyń 15 múshesine kómek kórsetý mindetterin atqardy.
7. Óńirlerge bólip qaraǵanda Aqtóbe, Almaty,Qaraǵandy, Batys Qazaqstan jáne Shyǵys Qazaqstan oblystarynyń telearnalary báıgege erekshe qyzyǵýshylyq tanytty.
8. Konkýrstyq jumystardyń basym bóligi «Úzdik aǵartýshylyq baǵdarlama» (52), «Úzdik áleýmettik joba» (39), «Úzdik oıyn-saýyq jobasy» (37) jáne «Úzdik derekti fılm» (28) atalymdaryna kelip tústi.
9. «Tumar» televızııalyq báıgesine arnaıy án jazyldy. Ony Qymbat Dosjan, Gúljan Muqysheva, Laýra Jaqypova, Maııa Bekbaeva, Pavel Tsybýlın, Darhan Ábdýahıt, Oleg Jýrkevıch, Erbolat Muhamedjan syndy qazaqstandyq telejýrnalıster oryndady.
10. «Transtelekom» AQ jáne «Qazaqtelekom» AQ báıgeniń bas demeýshileri atandy. Sondaı-aq, Coraggio premıým-klass erler kıimi býtıgi, Whiteboutique keshki jáne toı kóılekteri salony, Samidel' qazaqstanyq dızaınerlik buıymdar brendi, Damiani ıtalııalyq zergerlik buıymdar brendi jáne Mercur Auto Qazaqstandaǵy iri kólik salony uıymdastyrýshylarǵa qoldaý kórsetti.
