«Tumar» ulttyq televızııalyq syılyǵyna ótinim qabyldaý bastaldy
ASTANA. KAZINFORM – 14 mamyrdan bastap «Tumar» – 2025 ulttyq televızııalyq syılyǵyna ótinim qabyldap jatyr.
Baıqaýǵa 2024 jylǵy 13 mamyr men 2025 jylǵy 14 mamyr aralyǵynda qazaqstandyq telearnalardyń efırinde kórsetilgen jobalar qatysa alady. Ótinimdi respýblıkalyq jáne óńirlik telearnalar, telestýdııalar men kásibı televızııalyq kontent óndirýshi kompanııalar usynýǵa quqyly.
Baıqaý birneshe nomınatsııa boıynsha ótedi:
- Eń úzdik áleýmettik telejoba
- Jyldyń eń úzdik reportajy
- Eń úzdik aqparattyq-taldamalyq baǵdarlama
- Eń úzdik jýrnalıstik zertteý
- Jyldyń eń úzdik telehıkaıasy
- Eń úzdik derekti fılm
- Eń úzdik balalar telejobasy
- Eń úzdik óńirlik telearna
- Eń úzdik telejýrnalıst
- Eń úzdik telejúrgizýshi
- Eń úzdik sporttyq kommentator
Ótinim 2025 jylǵy 9 maýsymǵa deıin qabyldanady. Tolyq aqparatty tvtumar.kz resmı saıtynan bilýge bolady.
«Tumar» baıqaýy 2017 jyldan beri Mádenıet jáne aqparat mınıstrliginiń bastamasymen uıymdastyrylyp keledi. Osy ýaqyt ishinde syılyqqa 2200-den astam ótinim qabyldanyp, 354 joba nomınant atandy. Al «Tumar» músinshesin 98 jeńimpaz ıelendi.
Atalǵan televızııalyq baıqaýdyń byltyrǵy jeńimpazdarymen silteme arqyly ótip tanysýǵa bolady.