«Tumar» televızııalyq baıqaýyna qatysýǵa 400-ge jýyq ótinim qabyldandy
Baspasóz málimetterine qaraǵanda, «Tumar» ulttyq televızııalyq báıgesiniń saltanatty marapattaý rásimi 2018 jyldyń 16 naýryzynda Qazmedıa ortalyǵynda ótedi. Bıylǵy jylǵy saltanatty is-shara Qazaq televızııasynyń 60-jyldyǵyna arnalady. Tilshiler, televızııa qyzmetkerleri, memleket jáne qoǵam qaıratkerleri men estrada juldyzdaryna qosa saltanatty keshke qazaq televızııasynyń ardagerleri de shaqyryldy.
Aǵymdaǵy jylǵy báıgege 14 nomınatsııa boıynsha ótinimder qabyldaý 15-qańtar men 1-naýryz aralyǵynda júrgizildi. Olardyń ishinde qazaq televızııasynyń 60 jyldyǵy men Astananyń 20 jyldyǵyna arnalǵan erekshe nomınatsııalar bar. Sonymen qatar «Úzdik operatorlyq jumys», «Jyldyń úzdik telejúrgizýshisi», «Jyldyń úzdik telejýrnalısi», «Úzdik rejısserlik jumys» jeke nomınatsııalaryn da aıta ketý kerek.
«Tumarǵa» ótinimderdi qabyldaý tolyǵymen avtomattandyrylyp, kaztube.kz portalynyń negizinde júzege asyryldy. Báıgege qatysýshylardyń joǵary joǵary belsendilikterin atap ótý kerek. Ótinimderdi qabyldaý kezeńinde kaztube.kz portalyna kirýshiler sany 80%-ǵa ósti, al ótinimder sany byltyrǵy kórsetkishke qaraǵanda 1,6 esege artty (240 ótinim). 2018 jyly «Tumarǵa» 397 konkýrstyq jumys kelip tústi. Olardyń ishinde qazylar alqasy Báıge erejesiniń talaptaryna sáıkes resimdelgen 355 konkýrstyq ótinimdi qaraýǵa qabyldady»,-delingen baspasóz qyzmeti taratqan aqparatta.
Óńirlik turǵyda Aqtóbe, Almaty, Qaraǵandy, Batys jáne Shyǵys Qazaqstan oblystarynyń telearnalary kóbirek belsendilik tanytqan. Jumystardyń eń kóbi: «Úzdik derekti kıno», «Úzdik aǵartýshylyq baǵdarlama», «Úzdik áleýmettik baǵdarlama», «Úzdik oıyn-saýyq jobasy» nomınatsııalary boıynsha qabyldandy.
Báıgeniń qazylar alqasyna jýrnalıstıka men teleradıo habar taratý salalary boıynsha kásibı, biliktiligi joǵary sarapshylar kirdi.
Esterińizge sala ketsek, «Tumar» ulttyq televızııalyq báıgesi Qazaqstan Respýblıkasynyń Aqparat jáne kommýnkıatsııalar mınıstrligi tarapynan eń sapaly jáne mańyzdy televızııalyq mazmundy taýyp, dáripteý úshin, talantty professıonaldardy qoldaý jáne otandyq televızııanyń sapalyq standarttaryn arttyryp, qazaqstandyq televızııanyń damýyn qamtamasyz etý maqsatynda qurylǵan bolatyn.
