«Tumar» syılyǵyn tabystaý sharasynda ómirden ozǵan televıdenıe ardagerleri eske alyndy
ASTANA. QazAqparat - «Tumar» birinshi ulttyq televızııalyq baıqaýy syılyǵyn tabystaýǵa arnalǵan saltanatty sharaǵa qatysýshylar ómirden ozǵan ulttyq televıdenıe ardagerlerin 1 mınýt únsizdikpen eske aldy, dep habarlaıdy QazAqparat.
«Ulttyq televızııalyq «Tumar» báıgesi turaqty, áriptesterimniń árbir atar tańy shýaqty, áriptesterimniń barlyǵy jyl saıyn osyndaı synaqty, al bárimiz baı qýatty bolaıyq. Búgin televızııalyq «Tumar» báıgesine qatysýshylar da, marapattaýshylar da, maǵan deıin sóılegen sheshender de bul báıgeni birinshi dedi. Kelisýge de bolatyn shyǵar. Biraq, keńestik júıede, osynda ardagerler de otyr, dál osyndaı «Joldas» degen úlken konkýrs, úlken festıval bolǵan. Onyń ber jaǵynda Armanjan Baıtasov uıymdastyrǵan «Altyn juldyz» báıgesi bolǵan. Sondyqtan da «Tumar» báıgesiniń turaqty bolǵanyn qalaımyn», - dedi baıqaýdyń «Televızııanyń damýyna qosqan úlesi úshin» atalymy jeńimpazyn jarııa etýge shyqqan tanymal telejýrnalıst Nurtileý Imanǵalıuly.
Sonymen qatar ol Qazaq televıdenıesiniń 60 jyldyq tarıhy bar ekendigin biraq, ol tek ulttyq arnanyń ǵana 60 jyldyǵy emestigin basa aıtty.
«Menińshe, bul qazaqstandyq arnalardyń, qazaq televızııasynyń 60 jyldyǵy. Demek, 60 jylda jasaǵan úlken mektep bar. Sol mektepti jasaǵan tulǵalar bar. Ómirden ozyp ketken azamattar bar. Keńestik júıede ekinshi ǵaryshker Tıtovtan suhbat alǵan Sovet Mazǵutov sekildi ustazymyzdy, keshegi Kamal Smaıylov ustazymyzdy, Saǵat Áshimbaevty, Ádilbek Taýasarovty, Galına Kýzembaevany, Ydyrys Qasymovty, Sholpan Baımoldınany, ómirden ozǵan ózge adamdardyń esimin osynda atamasaq bizge kúná bolady dep oılaımyn. Sondyqtan osy men jańa ǵana ataǵan adamdarmen qatar búginde bizdiń ortamyzda joq televıdenıeniń tarıhyn jasaǵan, televızııa tulǵalarynyń mektebin qalyptastyrǵan adamdardy qazir biz birinshi báıgede bir mınýt eske alaıyq», - dedi Imanǵalıuly.
Aıta keterligi, «Tumar» birinshi ulttyq televızııalyq baıqaýynyń «Televızııanyń damýyna qosqan úlesi úshin» atalymynyń bas júldesi televızııa tarlany Sultan Orazalyǵa buıyrdy. Jeńimpazǵa arnaıy músinsheni tanymal telejýrnalıst Nurtileý Imanǵalıuly men Qazaq ulttyq óner ýnıversıtetiniń rektory Aıman Musaqojaeva tabys etti.
«Osy televıdenıege men 22 jasymda kelgen edim. Ómirimniń 20 jylyn arnadym. Biraq, odan keıin basqa qyzmetterge ketsem de kúni-búginge deıin televıdenıeden qol úzgenim joq. Keshe keshkisin ǵana meniń televıdenıeden sóılegen sózimdi estidińizder. Televızııa degen aldy-artyńa qaraýǵa mursha bermeıtin jáne bir ret ishine kirgennen keıin qaıta odan qol úzip kete almaıtyn óner», - dedi óz kezeginde atalym júldegeri Sultan Orazaly.
