Tumar patshaıym róline náreste izdestirilip jatyr
ALMATY. QazAqparat - «Qazaqfılm» kınostýdııasy «Tumar patshaıym» tarıhı kartınasy boıynsha saq hanshaıymynyń sábı kezindegi rólin somdaýǵa jańa týǵan qyz balany izdestirip jatyr. Bul týraly QazAqparat tilshisine «Sataıfılm» kınokompanııasynyń kastıng dırektory Jaına Ábdibek aıtty.
Shaqalaqtardyń túr-álpeti basty róldi oınaıtyn Almıra Tursynǵa uqsaýy tıis.
Onyń aıtýynsha, ázirge náreste tek Almaty qalasynan izdestirilip jatyr.
«Týǵanyna 5-10 kún bolǵan náreste izdestirilip jatyr. Túsirilim alańynda balapanǵa bar jaǵdaı jasalǵan. Bul jerde jyly, qaýipsiz, yńǵaıly. Kastıngke tek qana Almatydaǵy náresteler shaqyrylyp jatyr. Óıtkeni, ata-analar respýblıkanyń túkpir-túkpirinen Almatyǵa emizýli balasyn ákep áýrege túspegeni durys. Tumar patshaıymnyń náreste kezindegi rólge birneshe balany iriktep alamyz. Sebebi,olardyń bári birdeı túsirilim alańyna kele almaýy múmkin», - dedi Jaına Ábdibek.
Sonymen qatar jaqynda «Qazaqfılm» kınostýdııasy 3-7 jas aralyǵyndaǵy qyz balalarǵa kastıng jarııalaǵan bolatyn.
Jaına Ábdibektiń aıtýynsha, qazir kastıngtiń 2-kezeńi bastaldy.
«Qazir vıdeotúsirilim jumystary bastaldy. 3, 5, 7 jas aralyǵyndaǵy 463 qyzdyń fotosy iriktelip alyndy. Al Almıra Tursynovaǵa qatty uqsaıtyn 10 jastaǵy qyz bekitildi»,- dedi ol.
Kastıng dırektory balalarmen jumys jasaýdyń qıynshylyǵy týraly da aıtyp berdi.
«Іrikteý vıdeotúsirilimderi balalardy kınoǵa daıyndaý úshin óte qajet kezeń. Bala kameralarǵa, betine túsken jaryqtarǵa úırenýi kerek. Osy baǵytta men jáne meniń assıstentterim jumys istep jatyr», - dedi kastıng-dırektor.
Jaına Ábdibektiń aıtýynsha, «Qazaqfılm» kınostýdııasy kınoǵa túsetin nárestelerge naýryzdyń 5-6 kúni kastıng jarııalamaq.
