«Tumar» men «Úrker» syılyǵynyń jeńimpazdary anyqtaldy
ASTANA. KAZINFORM — Búgin elordada ulttyq televızııalyq «Tumar» jáne «Úrker» syılyqtarynyń jeńimpazdary marapattaldy. Bıyl eki joba alǵash ret Qazaqstan Media Awards ulttyq medıa syılyǵy aıasynda biriktirilgen edi. Saltanatty rásimge elimizdiń ár óńirinen kelgen júzdegen medıa maman qatysty.
Baıqaý Qazaqstan Respýblıkasy Mádenıet jáne aqparat mınıstrliginiń bastamasymen uıymdastyryldy.
— Tumarǵa da, Úrkerge de, «Astana media week» de bıyl 10 jyl. On jyl degen ońaı beles emes. Oǵan jetý úshin úlken eńbek kerek. Memleket árdaıym kásibı jýrnalısterdi qoldaýǵa múddeli. Memleket basshysy da jýrnalıstıka salasyna erekshe kóńil bólip, sala ókilderine qoldaý kórsetip keledi. Meniń oıymsha, aldaǵy ýaqytta da memlekettiń medıa salasyna qatysty saıasaty ózgermeıdi. Sizder memleket qoldaýyn sezinip, onyń qamqorlyǵynda bolasyzdar dep senemin, - dedi alǵy sózinde QR Mádenıet jáne aqparat mınıstri Arman Qyryqbaev.
Bıyl saıysqa 12 atalym boıynsha 600-den astam ótinim qabyldanǵan. Olardyń qatarynda televızııa, baspasóz, ınternet jáne radıo salalaryndaǵy jýrnalıstik jumystar bar.
Zamanaýı medıatehnologııalar men tyń formattarǵa da nazar aýdaryldy. Bıyl alǵash ret «Jýrnalıstıkanyń bolashaǵy: jasandy ıntellekt salasyndaǵy úzdik joba» atty arnaıy atalym engizildi.
Al baıqaý jeńimpazdary tómendegideı:
*«Úrker» ulttyq syılyǵynyń jeńimpazdary:*
- «Jyldyń úzdik jýrnalısi» — Bestnews.kz Janar Serdalına
- «Úzdik radıojoba» — Qazaq radıosy - «Oıtuma» baǵdarlamasy
- «Jýrnalıstıkanyń bolashaǵy: jasandy ıntellekt salasyndaǵy úzdik joba» — Aıtainews Media Centre - «Al - jan»
- «Úzdik medıa joba» — Tengrinews - Tengri TV
- «Jyldyń úzdik materıaly» — Mıramgúl Rahatqyzy
– «Aqtóbe» gazeti – «Jasandy ıntellekt: adamzat jańa dáýirge aıaq basty»
- «Úzdik taldamalyq materıal» — Laýra Týsýpbekova - «Kazahstanskaıa pravda», «Moıa DNK - nashe bogatstvo»
«Tumar» ulttyq syılyǵynyń jeńimpazdary:
- «Úzdik telejúrgizýshi» — Veronıka Vıshnevskaıa - «Eýrazııa» birinshi arnasy
- «Úzdik derekti joba» — 24 KZ «4739» (aǵzany transplantatsııalaý týraly)
- «Úzdik televızııalyq materıal» — Qazaqstan telarnasy - «Qarqyndy qurylys»
- «Úzdik áleýmettik joba» — Jibek joly - «Pravda v detalıah»
- «Úzdik telehıkaıa» — Astana TV «Aýyl bapkeri»
- «Úzdik aqparattyq-taldamalyq baǵdarlama» — 7-arna - «Novostı»
Aıta keteıik, 2025 jyly ótken «Tumar» ulttyq syılyǵynda JIBEK JOLY telearnasy eki nomınatsııa boıynsha jeńimpaz atanǵan edi.
