«Tumar» ádebı-kórkem jýrnalynyń ınternet saıty ashyldy
ASTANA. 13 jeltoqsan. QazAqparat /Jasulan Amanbaıuly/ - QR Ulttyq akademııalyq kitaphanasynda respýblıkalyq «Tumar» ádebı-kórkem jýrnalynyń ınternettegi saıtynyń tanystyrylymy ótti.
Tusaýkeserge elimizdiń tanymal tulǵalary qatysyp, redaktsııa basshylyǵyna ózderiniń júrekjardy lebizderin jetkizdi.
Jýrnaldyń bas redaktory, aqyn, QR Memlekettik syılyǵynyń laýreaty Farıza Ońǵarsynovanyń aıtýynsha, basylymnyń basty maqsaty prozaǵa, poezııaǵa, dramaǵa qalam terbep júrgen jas jazýshylar men aqyndardyń órisin ashý, olarǵa óz shyǵarmashylyǵyn tanytýǵa múmkindik jasaý.
Úsh jyl buryn ashylǵan basylymnyń oqyrmandary jáne árdaıym tyrnaqaldy týyndylaryn salyp, bastyryp turatyn avtorlar sany da birshama artqan.
«Teledıdar men kompıýter dáýiri órlep turǵan búgingi zamanda ádebıet pen óner qalys qalyp barady degen pikirler basym. Alaıda, ádemi óleń, kórkem áńgime, oıly drama jazatyn daryndylardyń, halqymyzdyń keń-baıtaq jerimizdiń ómirin órnektegen sóz sheberleriniń týyndylary joǵarydaǵy pikirdiń shyndyqqa janaspaıtynyn rastap otyr», - deıdi bas redaktor.
«Qazaqstandyq jastardyń shyǵarmashylyǵynan syr aǵytatyn ádebı-kórkem jýrnal qazirgi qazaq ádebıetiniń tylsym tustary men zamanaýı týyndylarynyń aınasy ispettes», - deıdi tusaýkeserge kelgen jas jazýshylar.
Saıt aqyn Farıza Ońǵarsynovanyń tikeleı jetekshiligimen qazaq jáne orys tilderinde jaryq kórýde. Aitumar.kz saıtynda proza, poezııa, drama, maqalalarmen jáne zergerlik óner salalarymen qatar kórkemsýret janrlary da qamtylǵan.
«Tumardyń» oqyrmandary kóbeıip, qarajaty molaıyp jatsa, qazaqtyń jas shyǵarmashyl jastarynyń týyndylaryn aǵylshyn tiline aýdartyp, shetelden kelgen árbir qonaqqa qazirgi zamanǵy tól ádebıetimizdi kórsetkimiz keledi», - deıdi F.Ońǵarsynova.
