Tumandy Albıonda da tilsiz jaý órship tur: Órtpen kúreste brıtandyqtar tájirıbesi qandaı
Ulybrıtanııada byltyrǵy aptap ystyqta órt jaǵdaılary kóp bolyp, halyqty ábigerge saldy. Tilsiz jaý Londonnyń shyǵysyndaǵy Vennıngton aýdanynyń túgin qaldyrmady. Al bıyl júzdegen dala alqaptaryndaǵy shóp otqa orandy. Sońǵy eki apta kóleminde Ulybrıtanııa tarıhyndaǵy eń úlken órtterdiń biri Shotlandııadaǵy ormandarda tirkeldi.
«Biz ystyq ári qurǵaq kezeńderdiń kýási bolyp júrmiz. Eger kómirqyshqyl gazynyń taraýyn jáne atmosfera quramyndaǵy parnıktik gazdyń deńgeıin azaıtpasaq, boljam boıynsha, bul protsess osy ǵasyrdyń sońyna deıin jalǵasa bermek», - deıdi London ekonomıka mektebi ýnıversıtetiniń professory Tom Smıt.
Ǵalymdardyń pikirinshe, erte áreket etý óte mańyzdy. Sondyqtan olar jalyn jalmaý yqtımaldylyǵy joǵary jerlerdi kompıýterlik tehnologııalardyń kómegimen aldyn ala anyqtaýǵa tyrysady. Startap jobalardyń avtorlary bolsa, jasandy ıntellektiniń kómegine júginýge shaqyrady. Olardyń oılap tapqan qurylǵylary orman órtteriniń alǵashqy belgilerin tanyp-bilýge mashyqtanǵan. Kameralar búkil aqparatty jasandy ıntellekt arqyly saraptap otyrady.
«Órt sóndirýshiler aldynda shynymen de qıyn mindet tur. Olardyń der kezinde áreket etýge múmkindikteri bola bermeıdi. Tilsiz jaýdyń tutanǵan jeri erterek anyqtalsa, ony aýyzdyqtaýǵa kóp shyǵyn ketpeıdi», - deıdi Robotics cats kompanııasynyń bas dırektory Andre Chang.
Londondaǵy órt sóndirý jáne qutqarý qyzmeti týraly aıtatyn bolsaq, munda jumysty qamtamasyz etýge qajet tehnologııalardyń bári bar - qaıyqtan bastap, tynys alý apparattaryna deıin. Katerleri órt sóndirýge qajet ózen sýyn sorý úshin ǵana paıdalanylmaıdy - apatqa ushyraǵan kemelerdi qutqarady jáne sýǵa ketkenderge kómektesedi. Drondary órt sóndirýshiler úshin qaýipti jerlerge kiredi. Barlyǵy baqylaý ortalyǵy arqyly basqarylyp otyrady.
«Myna elektrondy kartaǵa qarap, London tóńiregindegi belsendiligimizdi anyq ańǵarýǵa bolady. Jasyl tús - órt sóndirý kólikteri men qyzmetkerlerimiz jetkilikti degendi bildiredi. Qyzyl túspen beınelengen jerlerge kómek kerek. Jáne bul túster onlaın rejımde jańartylyp otyrady», - deıdi London órt sóndirý jáne qutqarý qyzmeti baqylaý ortalyǵynyń bastyǵy Robert Hannan.
Tehnologııalar ozyq bolǵanymen, órt sóndirýshilerdiń aılyǵy az bolyp tur. Órt sóndirýshilerdiń ortasha jalaqysy bizdiń valıýtamen 2 mln teńge kóleminde. Biraq ınflıatsııa deńgeıi sharyqtaǵan zamanda London úshin bul túk te emes. Sondyqtan qaýipti mamandyq ıeleri ereýilge shyqqysy da kelgen. Budan bólek qysqartýlar da kóp, jumys qoly jetispeıdi. Qazir úkimet pen kásipodaq uıymdary kelissózder júrgizip jatyr.
