Tumanbaı Moldaǵalıevtiń «Júregimniń sózi» atty jyr jınaǵyna aqynnyń jarııalanbaǵan óleńderi engen
ASTANA. 4 qańtar. QazAqparat - Qazaq poezııasynda syrshyl lırızmdi damytqan aqyn, Qazaqstannyń Halyq jazýshysy, Qazaqstan Respýblıkasy Memlekettik syılyǵynyń laýreaty, Búkil Túrki dúnıesi aqyndarynyń Fızýlı atyndaǵy syılyǵynyń ıegeri, Jambyl atyndaǵy halyqaralyq syılyqtyń laýreaty Tumanbaı Moldaǵalıevtiń artynda óshpes mura, sarqylmas qazyna qaldy.
Almaty qalasyndaǵy «Mıras» baspasynan aqynnyń «Júregimniń sózi» atty jyr jınaǵy jaryq kórdi. Onda qalamgerdiń buryn jarııalanbaǵan, ómiriniń sońǵy mezgilinde jazǵan óleńderi engen. Bul kitapqa Memlekettik syılyqtyń laýreaty, fılologııa ǵylymdarynyń doktory, professor, QR Ǵylym Akademııasynyń akademıgi Serik Qırabaev alǵy sóz jazǵan.
Kitaptyń jaryq kórýine qazaqtyń belgili ultjandy azamaty, ádebıet janashyry Serik Úmbetov qoldaý jasaǵan. Redaktsııasyn basqarǵan ekonomıka ǵylymdarynyń doktory, professor Serikbaı Nurǵısaev. Aqynnyń óleńderin jınap, baspaǵa daıyndaǵan Tumaǵanyń aıaýly jary Kúltaı Qasymova.
«Bul kitap qazaq poezııasyn súıip oqıtyn oqyrmandarǵa syı retinde shyǵyp otyr. Tumanbaı aǵamyzdyń óleń jazbaıtyn kúni bolmaǵan shyǵar. Artynda qandaı mura qaldy eken, kózi tirisinde jaryq kórmegen óleńderi bar ma eken oımen Kúltaı apamyzben jáne belgili jazýshy aǵamyz Beksultan Nurjekeevpen aqyldasyp, aqynnyń óner jolyndaǵy murasyna zer salyp edik, jarııalanbaǵan óleńderi kóp eken. Kitaptyń tez arada jaryq kórýine yqpal etken azamattyń biri - Serik Úmbetov. Bizdiń usynysymyzdy birden qoldap, aqyn kitabynyń oqyrman qolyna jetýine atsalysty. Sáýle Qabyldınova basqaratyn «Mıras» baspasy jyr jınaqtyń tez arada shyǵýyn qamtamasyz etti. Kitaptyń barlyq danasy Kúltaı apamyzǵa tabys etildi»,- dedi kitaptyń redaktsııasyn basqarǵan ekonomıka ǵylymdarynyń doktory, professor Serikbaı Nurǵısaev.
