Tuman, jel, kóktaıǵaq: Qazgıdromet 30 qańtardaǵy aýa raıy boljamyn jarııalady

ASTANA.KAZINFORM — «Qazgıdromet» RMK 30 qańtarda eldiń basym bóliginde aýa raıyna baılanysty eskertý jasady.  

Sınoptıkterdiń boljaýynsha, Qazaqstan aýmaǵynyń basym bóliginde jaýyn-shashynsyz aýa-raıy saqtalady. Tek eldiń batysynda, soltústiginde, ońtústiginde atmosferalyq frontaldy bólimderdiń ótýimen qar jaýyp, jaıaý burqasyn bolady. Respýblıka boıynsha jel kúsheıip, tuman, kóktaıǵaq boljanady.

Mańǵystaý oblysynyń soltústik-shyǵysynda, ortalyǵynda kóktaıǵaq, tuman bolady. Ońtústik-shyǵystan jel soǵyp, túnde oblystyń batysynda, ońtústiginde, ortalyǵynda ekpini 15-20 m/s jetedi.

Tańerteń jáne kúndiz Aqtóbe oblysynyń ońtústigin, shyǵysyn, ortalyǵyn tuman basady. Aımaqtyń ortalyǵynda jaıaý burqasyn bolyp, ońtústik-shyǵystan jel soǵady, oblystyń ortalyǵynda ekpini 15-20 m/s.

Atyraý oblysynyń batysynda, soltústiginde tuman kútiledi.

Qaraǵandy oblysynyń batysynda, soltústiginde, shyǵysynda, sondaı-aq Ulytaý oblysynyń soltústiginde, shyǵysynda, ortalyǵynda tuman bolady.

Tuman Shyǵys Qazaqstan oblysynyń soltústigin, ońtústigin jáne ortalyǵyn da basady.

Abaı oblysynyń soltústiginde, shyǵysynda, ońtústiginde tuman bolyp, jel soltústik-shyǵystan soǵady, kúndiz Aıagóz aýdanynda ekpini 15-18 m/s jetedi. 

Jambyl oblysynyń taýly aýdandarynda qar, jaıaý burqasyn boljanǵan. Keı ýaqyttarda tuman, kóktaıǵaq bolady. Soltústik-shyǵystan jel soǵyp, oblystyń ońtústik-batysynda, soltústik-shyǵysynda, taýly aýdandarynda 15-20 m/s, ekpini 25 m/s bolady.

Aıta keteıik, búgin elimizdiń 7 qalasynda aýa sapasy tómendeıdi.