Tuman, jel, burshaq: 22 mamyrǵa arnalǵan aýa raıy boljamy

ASTANA. KAZINFORM - Qazgıdromet mamandary 22 mamyrǵa arnalǵan aýa raıy boljamyn usyndy. 

Sınoptıkterdiń boljamy boıynsha, respýblıkanyń basym bóliginde atmosferalyq fronttar áserinen naızaǵaı oınap, ekpindi jel soǵady, soltústikte burshaq jaýady. Almaty oblysynyń taýly aımaqtarynda túnde jaýyn-shashyn (jańbyr, qar) bolady.

Respýblıka boıynsha tuman túsip, ekpindi jel soǵady.

Qaraǵandynyń ońtústiginde, Qostanaıda, Atyraýdyń soltústik-batysynda, Qyzylordanyń shyǵysynda, batysynda, Batys Qazaqstannyń ońtústik-batysynda, soltústik-batysta, Shyǵys Qazaqstan oblysynyń ońtústik-shyǵysynda, Abaı oblysynyń ortalyǵynda joǵary órt qaýpi saqtalady.

Abaı oblysynyń ońtústiginde, Túrkistan oblysynyń shóldi aımaqtarynda tótenshe órt qaýpi bar.