Tuman, kóktaıǵaq, shańdy daýyl: Sınoptıkter 13 óńirde eskertý jarııalady

ASTANA. QazAqparat – «Qazgıdromet» RMK 17 naýryzda birqatar óńirde kún raıy buzylatyny jóninde eskertý jasady, dep habarlaıdy QazAqparat.

Almaty oblysynyń ońtústigi men taýly aýdandarynda tuman kútiledi.

Almaty qalasynda keı ýaqytta tuman boljanady.

Qyzylorda oblysynda jel soltústik-shyǵystan soǵady, oblystyń ortalyǵynda ekpini kúndiz 15-20 m/s quraıdy.

Astana qalasynda túnde jáne tańerteń tuman kútiledi. Joldarda kóktaıǵaq bolady.

Batys Qazaqstan oblysynda jel ońtústik-shyǵystan soǵady, kúndiz óńirdiń batysy men ońtústiginde kúshi 15-20 m/s quraıdy.

Aqmola oblysynyń soltústigi men shyǵysynda tuman, kóktaıǵaq kútiledi.

Túnde jáne tańerten Jetisý oblysynyń taýly aýdandarynda tuman bolady.

Soltústik-batystan jel soǵady, ekpini – 15-20 m/s.

Atyraý oblysynyń batysynda, shyǵysy men ońtústiginde shańdy daýyl turady. Ońtústik-shyǵystan jel soǵady, óńirdiń batysynda, shyǵysy men ońtústiginde ekpini 15-20 m/s quraıdy.

Qostanaı oblysynyń ońtústiginde tuman bolady. Kúndiz 2-7 gradýs jyly bolady.

Túnde jáne tańerteń Pavlodar oblysynyń batysy men soltústiginde tuman kútiledi.

Kúndiz Mańǵystaý oblysynyń soltústiginde, ońtústigi men ortalyǵynda shańdy daýyl turady. Túnde oblystyń basym bóliginde, kúndiz soltústiginde, ońtústigi men ortalyǵynda 15-20 m/s ekpinde jel bolady.

Túrkistan oblysynyń soltústiginde, batysynda, taýly jáne taý bókterli aýdandarynda shyǵystan jel soǵady, kúshi 23 m/s jetedi.

Shymkent qalasynda shyǵystan jel soǵady, kúndiz ekpini 15-20 m/s quraıdy.

Sondaı-aq 17-18 naýryz aralyǵynda Jetisý, Almaty oblystarynyń taý jáne taý etegindegi aýdandarda, sonymen qatar Almaty qalasynyń mańyndaǵy aımaqtarda jańbyr jáne jylbysqy qar túrindegi qatty jaýyn-shashyn boljanady. Sondaı-aq temperatýralyq fon joǵarylaıdy. Osyǵan baılanysty qar qarqyndy erip, taý betkeılerinen erigen qar sýy aǵady, sý alaptarynda muz álsirep, sý deńgeıi kóteriledi. Sý arnadan asyp, jaıylýy múmkin.