Tuman, kóktaıǵaq: Aýa raıyna baılanysty alty óńirde eskertý jarııalandy

ASTANA. KAZINFORM -  Sınoptıkter elimizdiń alty óńirinde daýyldy eskertý jarııalady.

«Qazgıdromet» RMK málimetinshe, 25 aqpanda Shymkent qalasynda tuman túsedi.

Aqmola oblysynyń soltústiginde, shyǵysynda jáne ońtústiginde qarly boran, jel soǵady. Ekpini – 15-20 m/s.

25-27 aqpanda Jambyl oblysynyń taýly aımaqtarynda tuman, kóktaıǵaq bolady, qar jaýady.

Qyzylorda oblysynda soltústik-shyǵystan, ortalyqta kúndiz soltústikten, oblystyń ońtústiginde kúshi 15-20 m/s jel soǵady.

Soltústik Qazaqstan oblysynyń shyǵysy men ońtústiginde burqasyn bolady. Oblystyń ońtústiginde batystan soǵatyn jeldiń ekpini 15-20 m/s jetedi.

Túrkistan oblysynyń taýly aımaqtarynda tuman túsedi, jańbyr jaýady.

Sınoptıkterdiń málimetinshe, respýblıkanyń batysy men soltústik-batysy antıtsıklon yqpalynda bolǵandyqtan jaýyn-shashynsyz aýa raıy saqtalady.

Elimizdiń qalǵan bóliginde atmosferalyq frontaldy bólikterdiń ótýine baılanysty qar jaýyp, jel kúsheıedi, tuman túsedi.